პრემიერს ვურჩევდი მომავალში რიტორიკა შეარჩიოს და ანალიზი გააკეთოს - ასე პასუხობს "თვისუფალი დემოკრატების" წევრი ვიქტორ დოლიძე პრემიერის განცხადებას, სადაც ირაკლი ღარიბაშვილმა თავდაცვის ყოფილ მინისტრს ირაკლი ალასანიას "უჭკუო", "ავანტიურისტი" და "ამბიციურ" უწოდა.
ვიქტორ დოლიძის შეფასებით, ირაკლი ღარიბაშვილის ქცევა არაკონსტრუქციული იყო და ეს მასზე ცუდად აისახება.
"მე პრემიერს ვურჩევდი მომავალში რიტორიკა შეარჩიოს და ანალიზი გააკეთოს ვის და რა თემებზე მიმართავს. პოლიტიკური სიმწიფე პირადად მას წაადგება", - განაცხადა ვიქტორ დოლიძემ.
დოლიძე ასევე, ირაკლი ალასანიას მიერ, "ნაციონალური მოძრაობის" ლობირებასთან დაკავშირებით, პრემიერის განცხადებას აფასებს და ღარიბაშვილს სამომავლოდ ანალიზის გაკეთებისკენ მოუწოდებს.
საქართველოს პრემიერ-მინისტრმა ირაკლი ღარიბაშვილმა დღეს, მთავრობის სხდომაზე, ირაკლი ალასანიას "უჭკუო", "ავანტიურისტი" და "ამბიციურ" უწოდა. მან ამავე კონტექსტში მოიხსენია პოსტიდან გადამდგარი მინისტრები, ალექსსი პეტრიაშვილი და მაია ფანჯიკიძე.
"მოგვიწევს კიდევ ერთი ორი კვირა ინტენსიურად მუშაობა, რომ ყველა აბსურდული კითხვა მოვხსნათ, მაგრამ ჩვენ ამას შევძლებთ. მინდა, მოსახლეობას მოვუწოდო, რომ დამშვიდდნენ, რეალურად არაფერი ხდება - ერთი ავანტიურისტი, უჭკუო და ამბიციური მინისტრი ჩამოშორდა მთავრობას, ამით ცუდიც არაფერი მომხდარა. მინდა გავიხსენო, რომ ერთადერთი მინისტრი, რომელიც ღიად ლობირებდა და მფარველობდა "ნაციონალებს" იყო ირაკლი ალასანია, დაწყებული გიგი უგულავათი, ბოკერიათი. ასე რომ, ჩემში ყველა კითხვას აქვს პასუხი", - განაცხადა ღარიბაშვილმა.
