საქართველოს სახალხო დამცველის, გიორგი ტუღუშის 2009 წლის მეორე ნახევრის ანგარიშის თანახმად, რომელიც განსახილველად უკვე შევიდა პარლამენტში, ზოგიერთი სასჯელაღსრულების დაწესებულების საყოფაცხოვრებო და სანიტარულ-ჰიგიენური პირობები იმდენად ცუდია, რომ აღნიშნულ დაწესებულებებში განთავსებული პატიმრები, შეიძლება ითქვას, რომ არაადამიანურ და ღირსების შემლახავ პირობებში იმყოფებიან.
"მიუხედავად იმისა, რომ აშენდა და ექსპლუატაციაში შევიდა ახალი სასჯელაღსრულების დაწესებულებები, კვლავ პრობლემად რჩება დაწესებულებები, რომლების დახურვის რეკომენდაციაც იქნა გაცემული სახალხო დამცველის ანგარიშებში. ესენია თბილისის N1, ბათუმის N3 და ზუგდიდის N4 საპყრობილეები, ასევე, ხონის N9 საერთო და მკაცრი რეჟიმის დაწესებულება. ასევე უმძიმესი მდგომარეობაა ქსნის N7 დაწესებულებაში, რომლის ინფრასტრუქტურა და საყოფაცხოვრებო თუ ჰიგიენური
პირობები კვლავ არადამაკმაყოფილებელია", - ნათქვამია ანგარიშში.
როგორც სახლახო დამცველის ანგარიშშია აღნიშნული, ხსენებული პრობლემების მოგვარება, ასევე სათანადო სანიტარულ-ჰიგიენური მდგომარეობის უზრუნველყოფა შეუძლებელია დაწესებულების კაპიტალური გარემონტების გარეშე.
ამასთან, გიორგი ტუღუშის მიერ მომზადებული ანგარიშში წერია, რომ ციხის პირობების არსებობა არ არის გამართლებული რესურსების ნაკლებობით,
სასჯელაღსრულების დაწესებულებაში მოთავსების შემდეგ დაპატიმრებული პირები არ უნდა კარგავდნენ ადამიანური ღირსების შეგრძნებას, მიუხედავად მათ მიერ ჩადენილი დანაშაულის სიმძიმისა.
ანგარიშში საუბარია იმ ელემენტარულ საცხოვრებელ პირობებზე, რაც გიორგი ტუღუშის თქმით, ქართულ ციხეებში უნდა არსებობდეს:
"პატიმრებისათვის უზრუნველყოფილი საცხოვრებელი, განსაკუთრებით კი, საძინებელი, უნდა პასუხობდეს ადამიანის ღირსების პატივისცემის და მაქსიმალური შესაძლებლობის ფარგლებში, ასევე განმარტოების მოთხოვნებს. ასევე დაცული უნდა იყოს ჯანმრთელობისა და ჰიგიენის მოთხოვნები, ჯეროვანი ყურადღება უნდა დაეთმოს კლიმატურ პირობებსა და განსაკუთრებით ფართის ოდენობის, ჰაერის მოცულობას, განათებასა და ვენტილაციის
პირობებს ყველა შენობაში, სადაც პატიმრები ცხოვრობენ, მუშაობენ ან იკრიბებიან: ფანჯრები უნდა იყოს საკმარისად დიდი, რათა საშუალება მიეცეთ პატიმრებს, იკითხონ ან იმუშაონ ბუნებრივი განათების ნორმალურ პირობებში, ასევე იძლეოდეს სუფთა ჰაერის მოძრაობის შესაძლებლობას, გარდა იმ შემთხვევისა, როცა არსებობს ჰაერის კონდიცირების ჯეროვანი
სისტემა; ხელოვნური განათება უნდა აკმაყოფილებდეს მიღებულ ტექნიკურ სტანდარტებს; უნდა არსებობდეს სიგნალიზაციის სისტემა, რომელიც საშუალებას მისცემს პატიმრებს, დაუყოვნებლივ დაუკავშირდნენ პერსონალს", -ნათქვამია სახალხო დამცველის ანგარიშში.