თუ სამართლიანობის აღდგენის პროცესი არ დაიძრა და ამას შემდგომი ორი წლის განმავლობაში ხელისუფლება ვერ გადაწყვეტს, დარწმუნებული ვარ, ჩვენ ძალიან სერიოზული პრობლემები გვექნება 2016 წლის საპარლამენტო არჩევნებში, - აცხადებს გაზეთ "პრემიერისთვის" მიცემულ ინტერვიუში პარლამენტის წევრი "ეროვნული ფორუმიდან" გუბაზ სანიკიძე.
მისი თქმით, უსამართლობასთან დაკავშირებით რომ საზოგადოებრივი დაკვეთა არსებობდა,
"დანაშაული, რომელიც პოლიტიკური მოტივით იქნა ჩადენილი, ანუ პოლიტპატიმრების საკითხი, ავად თუ კარგად, გადაწყდა; მეორე _ ეკონომიკური რეპრესიები, რომელიც ძალიან რთული თემაა და ძალიან ბევრია, საუბარია რამდენიმე ათასამდე საქმეზე. აქ არის დილემა და ამაზე ხელისუფლებაში მიდის საუბრები, წამოწეულია უამრავი საქმე, ზოგი ბოლომდეც არის მიყვანილი, მაგრამ საკითხი დგას ასე: თანამიმდევრობა როგორ დაიწყება და რამდენ ხანს გაგრძელდება. მოგეხსენებათ, პროკურატურაში მუშაობს რამდენიმე ათეული კაცი და საქმე არის 10 ათასზე მეტი. ხომ იცით ჩვენი ხასიათი, პირველი 10 საქმე რომ წაიწევს, დანარჩენი იტყვის, რომ იჩაგრება. ამიტომ ეს პრობლემა რეალურად და ფიზიკურად არის რთული. მე დეტალებში ჩახედული არ ვარ, თეორიებზე ვსაუბრობ და სულ სხვა რამეა კონკრეტული ოჯახები, რომლებსაც ლუკმაპური ამოართვეს პირიდან და მშივრები დატოვეს. დანამდვილებით ერთი რამ ვიცი, თუ სამართლიანობის აღდგენის პროცესი არ დაიძრა და ამ პრობლემას შემდგომი ორი წლის განმავლობაში ხელისუფლება ვერ გადაწყვეტს, დარწმუნებული ვარ, ჩვენ ძალიან სერიოზული პრობლემები გვექნება 2016 წლის საპარლამენტო არჩევნებში", - აცხადებს სანიკიძე და აღნიშნავს, რომ ეს ძალიან რთული საკითხია.
"ვადასტურებ, რომ, თუ ხელისუფლებამ ეს საკითხი არ მოაგვარა, ყოველ შემთხვევაში, დინამიკა მაინც თუ არ შევქმენით, ძალიან ძვირად დაგვიჯდება. მე როგორც ვიცი, საქმეების დიდი ნაწილი უკვე შესწავლილია, მაგრამ არის მოსაძებნი ფორმა, როგორ უნდა გეკეთდეს. შეიძლება მეც უნდა ვეკითხებოდე პროკურორს, მაგრამ არ ვეკითხები, რადგან უამრავი მნიშვნელოვანი საკითხია, სადაც ვმუშაობ, მაგრამ ეს საკითხი კოალიციისთვის გადამწყვეტი ფაქტორი იქნება. ნებისმიერი ხელისუფლება პასუხს ხალხის წინაშე აგებს და ჩვენც ხალხი გამოგვიტანს განაჩენს, ვვარგივართ თუ არ ვვარგივართ, როგორც ხელისუფლება", - აცხადებს გაზეთ "პრემიერთან" საუბარში სანიკიძე.