ნაწილობრივ უნდა გავიზიარო და დავეთანხმო ხელისუფლების წარმომადგენლებს, რომ არასამთავრობო ორგანიზაციებში უმეცრება ნამდვილად არსებობს, რადგან ის ადამიანები, რომლებიც არასამთავრობო სექტორიდან ხელისუფლებაში გადავიდნენ, ამის საუკეთესო მაგალითები არიან, - აცხადებს გაზეთ "პრემიერისთვის" მიცემულ ინტერვიუში უფლებადამცველი ლია მუხაშავრია.
მისი თქმით, ხელისუფლებაში უკეთესად გამოვლინდა მათი განვითარების დონე და ხარისხი.
"მაგრამ ეს სულაც არ ნიშნავს იმას, რომ ისინი, ვინც ხელისუფლებაში მოსვლისთვის არ ვიბრძოდით და არც დღეს ვიბრძვით, არაპროფესიონალები, უვიცები და მიკერძოებულები ვართ. რესურსი, რომელიც ნამდვილად არსებობს არასამთავრობო სექტორში, უნიკალურია და თუ ვინმეს მისი გამოყენება არ შეუძლია, ეს მათი პრობლემაა და არა თავად იმ რესურსისა, რომელიც ბუნებრივად არსებობს და არის გამოუყენებელი", - აცხადებს მუხაშავრია და ჟურნალისტის შეკითხვაზე ვის გულისხმობს არასამთავრობო სექტორიდან ხელისუფლებაში წასულებსა და უკან დაბრუნებულებში, პასსუხობს: "ძალიან ბევრია და გადახედეთ _ პარლამენტის ადამიანის უფლებათა დაცვის კომიტეტის თავმჯდომარე ეკა ბესელია, ან გედევან ფოფხაძე, დაგავიწყდათ? პირიქითაც რომ ხდება, სწორედ ამას ვამბობ, რომ არ უნდა ხდებოდეს, გუშინდელი მინისტრი რომ დღეს არასამთავრობო ორგანიზაციის სახელით აქტიურად მოქმედი სუბიექტი ხდება, ეს ნონსენსია. როგორც მე ვერ გავხდები დიდი ბრიტანეთის დედოფალი, ისე არ უნდა ხდებოდეს ყოფილი ხელისუფლების მაღალჩინოსანი არასამთავრობოს სახელით მოქმედი აქტიური სუბიექტი. მაგალითად, ეკა ტყეშელაშვილი რამდენი სამინისტროს მინისტრი იყო, დაგვავიწყდა?", - აცხადებს მუხაშავრია.