რუსეთ-აფხაზეთს შორის გასაფორმებელი "მოკავშირეობისა და ინტეგრაციის" შესახებ შეთანხმება აფხაზების ე.წ. "თავისუფლებისა და დამოუკიდებლობის ბრძოლის იდეის" დასასრულია, - ასე აფასებს აღნიშნულ შეთანხმებას სააგენტო "ჯი-ეიჩ-ენთან" საუბარში სამხედრო-ანალიტიკური ჟურნალი "არსენალის" მთავარი რედაქტორი, ექსპერტი ირაკლი ალადაშვილი.
მისივე თქმით, ეს შეთანხმება საქართველოსთვის უკვე არის არა თუ საფრთხე, არამედ უზარმაზარი პრობლემა.
" საქართველოსთვის, უკვე დიდი ხანია, ეს ყველაფერი არა თუ დიდი საფრთხეა, არამედ რეალურად, დიდი პრობლემაა. ეს შეთანხმება, საკუთრივ საფრთხეს წარმოადგენს თვითონ იმ ე.წ. აფხაზური შეიარაღებული ძალებისთვის, რომლითაც ასე ამაყობდნენ აფხაზი სეპარატისტები",- აცხადებს ექსპერტი და აღნიშნავს, რომ ამ შეთანხმებით, ფაქტობრივად მოხდება იმ სულ რამდენიმე ათასი აფხაზი ე.წ. სამხედროს ჩაყლაპვა" გაერთიანებული ჯარების დაჯგუფების მიერ".
"ეს უკვე გავლილია ოკუპირებულ ცხინვალის რეგიონში, სადაც ოსური ბატალიონი უკვე შედის რუსული მეოთხე საოკუპაციო ბაზის შემადგენლობაში. ასევე მოხდება აფხაზეთში მეშვიდე საოკუპაციო ბაზის შემთხვევაში", - აცხადებს ალადაშვილი.
შეგახსენებთ, რომ რუსეთი აფხაზეთთან "მოკავშირეობისა და ინტეგრაციის" შესახებ შეთანხმების გაფორმებას აპირებს. შეთანხმების პროექტის თანახმად, ინტეგრაციისა და პარტიორობის ძირითად მიმართულებებად განსაზღვრულია შეთანხმებული საგარეო პოლიტიკის გატარება; თავდაცვისა და უსაფრთხოების საერთო სივრცის ფორმირება; ერთიანი სოციალური და ეკონომიკური სივრცის შექმნა და საერთო კულტურული და ჰუმანიტარული სივრცის შენარჩუნება. გარდა ამისა, შეთანხმება ასევე ითვალისწინებს აფხაზეთის საზღვრების ერთობლივად დაცვას და ერთობლივი სამხედრო შენაერთების შექმნას. შეიარაღებული აგრესიის შემთხვევაში კი, მხარეები ვალდებული იქნებიან ერთმანეთს სამხედრო დახმარება აღმოუჩინონ. პროექტში წერია, რომ საქართველოსთან საზღვარზე კონტროლი ეტაპობრივად უნდა გამკაცრდეს, რუსეთთან კი პირიქით - ზედმეტი ბარიერები უნდა მოიხსნას.