კულტურისა და ძეგლთა დაცვის ყოფილი მინისტრი ნიკა რურუა ავარეთ-კახეთის საავტომობილო გზის მშენებლობას ეხმიანება და აცხადებს, რომ აღნიშნულთან დაკავშირებით, საზოგადოებამ ხმა უნდა აიმაღლოს, რადგანაც ამ შემთხვევაში კახეთის ცხინვალიზაცია რეალური გახდება.
„რუსეთმა სამხედრო გზის მშენებლობა დაიწყო, რომელიც დაღესტნიდან, ავარეთიდან კახეთის მიმართულებით იგება. კერძოდ კი ახალი გვირაბის გახნსა ყვარელში მოხდება. ეს კატეგორიულად დაუშვებელია, ამაზე საზოგადოებამ ხმა აუცილებლად უნდა აიმაღლოს, რადგანაც ამ შემთხვევაში კახეთის ცხინვალიზაცია რეალური გახდება. ეს ჩვენი ქვეყნის დაქუცმაცების რეალური წინაპირობაა. ბუნებრივია ეს სამხედრო გზა, საქართველოს თავზე ყოველთვის „დამოკლეს მახვილივით" იქნება დაკიდებული, რომ რუსეთს როცა მოესურვება ამ მხრიდანაც ადვილად შემოაღწიოს ჩვენს ქვეყანაში. ეს გზა კეთდება სწორედ იმიტომ, რომ იქ ტანკებმა გაიარონ და ის რეგიონი რუსეთზე სრულიად დამოკიდებული გახადონ. ეს იქნება კახეთის ცხინვალიზაცია. ამის გაკეთება წარმოუდგენელია, ეს ეროვნული ღალატი იქნება", _განაცხადა რურუამ ,,პრაიმ ტაიმის" პრესკლუბში სტუმრობისას.
შეგახსენებთ, რომ ავარეთ-კახეთის გზის მშენებლობასთან დაკავშირებით უკვე მიმდინარეობს მოსამზადებელი სამუშაოები, სამშენებლო ინფრასტრუქტურის შექმნა. გზის სიგრძე 80 კილომეტრი იქნება, აშენდება ხუთი გვირაბი და 25 ხიდი. ავტომაგისტრალი ერთმანეთთან დააკავშირებს კასპიისა და შავი ზღვების აუზს.