ექსპერტი უსაფრთხოების საკითხებში ხათუნა ლაგაზიძე ,,ჯი-ეიჩ-ენთან" საუბარში პრემიერ-მინისტრის ირაკლი ღარიბაშვილის გაეროს ასამბლეის 69-ე სესიაზე სიტყვით გამოსვლას პოზიტიურად აფასებს.
მისივე განმარტებით, პრემიერმა საინტერესო ინიციატივები გააჟღერა და სწორი აქცენტები გააკეთა. როგორც საკითხის კომენტირებისას ლაგაზიძე აცხადებს ღარიბაშვილმა ამ გამოსვლით საერთაშორისო საზოგადოების წინაშე აიღო ვალდებულება იყოს ქვეყანაში დემოკრატიული ღირებულებებისა და ფასეულობების დამცველი.
,,პრემიერ-მინისტრის ირაკლი ღარიბაშვილის გაეროში გამოსვლას მთლიანობაში დადებითად ვაფასებ. Nნამდვილად აღსანიშნავი გამოსვლა იყო, გააჟღერა საინტერესო ინიციატივები და სწორი აქცენტები დასვა. Pპირველ რიგში, საინტერესო იყო ის, რომ ხელისუფლებამ ამ გამოსვლით საერთაშორისო საზოგადოების წინაშე აიღო ვალდებულება იყოს ქვეყანაში დემოკრატიული ღირებულებებისა და ფასეულობების დამცველი, რადგან პრემიერმა საკმაოდ დიდი ნაწილი დაუთმო იმაზე საუბარს, თუ რამდენად მნიშვნელოვანია მათთვის იგივე მედიისა და სხვა ინსტიტუტების თავისუფლება, რომელიც საზოგადოებას ამ ხელისუფლებამ მოუტანა. პრემიერის გამოსვლაში ქვეყნის შიდა პოლიტიკურ საკითხებს თუ განვიხილავთ ჩემთვის პრინციპულად მნიშვნელოვანი იყო სწორედ მედიის თავისუფლების თემა, სადაც ღარიბაშვილმა ხაზგასმით აღნიშნა, რომ ის იქნება დამცველი და გარანტი იმ მედიასაშუალებების, რომლებიც განსხვავებულ პოზიციას აფიქსირებენ_აკრიტიკებენ ხელისუფლებას. იმედია, ხელისუფლება ამ პრინციპის ერთგული მართლაც დარჩება, რადგან ამ მიმართულებით რიტორიკა ქვეყნის შიგნით, ცოტა არ იყოს განსხვავებულია. იმედია, ისინი არ დააგებიან წინამორბედების, ,,ნაციონალების" გზას, როცა საერთაშორისო ასპარეზზე ხელისუფლება „დემოკრატიის შუქურა" იყო, რეალურად კი ქვეყნის შიგნით, ადამიანის უფლებების, დემოკრატიული ღირებულებების, იგივე მედიის თავისუფლების დაუნდობელი დევნა მიდიოდა. საზოგადოებამ ყველაფერი უნდა გავაკეთოთ იმისთვის, რომ პრემიერის საერთაშორისო თანამეგობრობისადმი გზავნილი მართლაც იყოს ქართული რეალობის ამსახველი", _აცხადებს ,,ჯი-ეიჩ-ენთან" საუბარში ლაგაზიძე.
მისივე განმარტებით, პრემიერმა საგარეო პოლიტიკური თვალსაზრისითაც სწორი აქცენტები გააკეთა.
,,რაც შეეხება საგარეო პოლიტიკურ აქცენტებს პრემიერის გამოსვლაში, ამ მიმართულებითაც ფართო თვალსაწიერი იყო მოცემული. კერძოდ, დიდი დრო დაეთმო საქართველოს ევროინტეგრაციის კურსზე საუბარს, ასევე სხვა გამოსვლებისგან განსხვავებით, გამორჩეულად მკვეთრი და მკაფიო მხარდაჭერა იყო უკრაინის ტერიტორიული მთლიანობისა. რუსეთთან ურთიერთობაში ითქვა, რომ საქართველოს ხელისუფლებამ მართლაც ყველაფერი გააკეთა სიტუაციის გასაუმჯობესებლად, მაგრამ მათი მხრიდან ადეკვატური ნაბიჯები არ გადადგმულა. აღსანიშნავის ისიც, რომ პრემიერმა განაცხადა, რომ საერთაშორისო ურთიერთობებში საქართველო უნდა იყოს მიმწოდებელი და არა მომხმარებელი, იგივე საერთაშორისო უსაფრთხოების, გლობალური ეკონომიკის თვალსაზრისით და ა.შ", _აცხადებს ლაგაძიზე, რომელიც ღარიბაშვილის ინიციატივას 2015 წელს „აბრეშუმის გზის ფორუმის" დაარსებასთან დაკავშირებით პოზიტიურად აფასებს.
ექსპერტი ხათუნა ლაგაზიძე იმედს გამოთქვამს, რომ ხელისუფლება მართლაც დარჩება დემოკრატიული ფასეულობების ერთგული და ღარიბაშვილის რიტორიკა მხოლოდ გარეშე თვალისთვის ნაცრის შეყრის მცდელობა არ იქნება და ასახავს ქვეყნის შიდა რეალობას.
შეგახსენებთ, რომ გაეროს გენერალური ასამბლეაზე მსოფლიოს ლიდერების წინაშე გამოსვლაში საქართველოს პრემიერ-მინისტრმა მადლობა გადაუხადა საერთაშორისო საზოგადოებას იმ ფასდაუდებელი მხარდაჭერისათვის, რომელსაც ისინი უცხადებენ საქართველოს დემოკრატიულ ტრანსფორმაციას, და დაადასტურა საქართველოს, როგორც მსოფლიოში უსაფრთხოებასა და უშიშროებაში მნიშვნელოვანი წვლილის შემტანის, როლი.
„დღეს ჩვენ ვართ ახალი დღის დადგომის მოწმე საქართველოში. ჩვენი დემოკრატიული ინსტიტუტები უფრო ძლიერია, ჩვენი საგარეო პოლიტიკა უკეთ უზრუნველყოფს ჩვენს უსაფრთხოებას, ხოლო მზარდი ეკონომიკა საქართველოს ყველა მოქალაქის სასარგებლოდ მუშაობს", - განაცხადა პრემიერ-მინისტრმა, ირაკლი ღარიბაშვილმა.
თავის გამოსვლაში საქართველოს პრემიერ-მინისტრმა ისაუბრა იმ მნიშვნელოვან გაუმჯობესებაზე, რომელსაც უკანასკნელი ორი წლის განმავლობაში საქართველომ მიაღწია ჯანდაცვის, განათლების, ეკონომიკისა და კანონის უზენაესობის სფეროებში. პრემიერ-მინისტრმა, ირაკლი ღარიბაშვილმა აღნიშნა: „ჩვენი მიზანია, გავაერთიანოთ ჩვენი საზოგადოება კანონის უზენაესობისა და დემოკრატიის მეშვეობით".
გარდა ამისა, პრემიერ-მინისტრმა ილაპარაკა „აბრეშუმის გზის" სრული პოტენციალის ამოქმედების ურყევ მხარდაჭერაზე საქართველოს მხრიდან. როგორც პრემიერ-მინისტრმა განაცხადა, „აბრეშუმის გზა" ფარავს ტერიტორიებს, რომელთა მოსახლეობა შეადგენს მსოფლიოს მოსახლეობის 2/3-ს და რომელთა მთლიანი შიდა პროდუქტი გლობალური მთლიანი შიდა პროდუქტის 60 პროცენტს შეადგენს. პრემიერ-მინისტრმა წამოაყენა „აბრეშუმის გზის ფორუმის" ორგანიზების ინიციატივა, რომელიც 2015 საქართველოში ჩატარდება. ეს იქნება იმ სახელმწიფოებისა და საერთაშორისო ორგანიზაციების ყოველწლიური მაღალი დონის შეხვედრები, რომლებიც დაინტერესებული არიან აბრეშუმის გზის მომავლით. „პოტენციალი დიდია მთლიანად რეგიონისთვისაც, თუმცა პოტენციალის რეალობად ქცევა მეტ ძალისხმევას მოითხოვს. საქართველო მზად არის გამოიყენოს თავისი, როგორც გზაჯვარედინზე მყოფი ქვეყნის, სტრატეგიული მდებარეობა და თავისი წვლილი შეიტანოს აბრეშუმის გზის სრულ აღდგენაში", - განაცხადა პრემიერ-მინისტრმა.
პრემიერ-მინისტრმა, ირაკლი ღარიბაშვილმა ასევე აღნიშნა საქართველოს, როგორც ნატოს სანდო მოკავშირის, როლი, რომლის მნიშვნელოვანი პროგრესი შეიარაღებული ძალების მოდერნიზაციაში და წვლილი ავღანეთში საერთაშორისო უსაფრთხოების მხარდაჭერის ძალებში აღიარებული იყო ნატოს სამიტზე. მან ასევე ხაზი გაუსვა საქართველოს დაინტერესებას რეგიონალური სტაბილურობის შენარჩუნებაში.
პრემიერ-მინისტრმა ირაკლი ღარიბაშვილმა დაადასტურა, რომ „ჩვენი მზადყოფნა, გვერდში დავუდგეთ ჩვენს მოკავშირეებს, არ არის ერთადერთი გზა, რომლითაც საქართველო, როგორც გლობალური უსაფრთხოების მიმწოდებელი ქვეყნა, ასრულებს თავის როლს. ჩვენ ასევე ვიყენებთ რაციონალურ მიდგომას რეგიონში დაძაბულობის შესუსტებისა და კონფლიქტების პრევენციისათვის".
