აშშ-ის პრეზიდენტმა დონალდ ტრამპმა განაცხადა, რომ რუსული ნავთობისა და გაზის ყიდვაზე უნგრეთის სანქციებისგან გათავისუფლების შესაძლებლობას განიხილავს.
ამის შესახებ The Guardian იუწყება.
უნგრეთის პრემიერ-მინისტრი ვიქტორ ორბანი ტრამპთან შესახვედრად 7 ნოემბერს ჩავიდა.
ჟურნალისტებმა ტრამპს ჰკითხეს, უფლებას აძლევდა თუ არა ის უნგრეთს, უარი თქვას რუსეთის ნავთობისა და გაზის წინააღმდეგ აშშ-ის სანქციებზე.
„რა თქმა უნდა, ჩვენ ამ საკითხს განვიხილავთ, რადგან მათთვის სხვა რეგიონებიდან ნავთობისა და გაზის მოპოვება ძალიან რთულია.
როგორც იცით, მათ ზღვაზე გასასვლელი არ აქვთ. ეს შესანიშნავი ქვეყანაა, დიდი ქვეყანა, მაგრამ მათ ზღვაზე გასასვლელი არ აქვტ. მათ პორტები არ აქვთ. ასე რომ, მათ რთული პრობლემა აქვთ“, - თქვა ტრამპმა.
მას ასევე ჰკითხეს ვლადიმირ პუტინთან ბუდაპეშტში შეხვედრის შესაძლებლობის შესახებ, რაზეც ტრამპმა უპასუხა: „შანსი ყოველთვის არსებობს“.
