ეს არის თავსმოხვეული სიცრუე, - ასე აფასებს გაზეთ "პრემიერთან" ინტერვიუში ყოფილი პარლამენტარი, იურისტი ვალერი გელბახიანი მოსაზრებას, რომ საქართველო საპარლამენტო რესპუბლიკაა. მისი თქმით, როცა პრეზიდენტი არის არჩევითი, არ შეიძლება ვილაპარაკოთ ცალსახა საპარლამენტო რესპუბლიკის მოდელზე.
"აქამდე ეს იყო მხოლოდ ჭორები და ახალ ეს ჭორი დადასტურდა, რომ პრაქტიკულად ხელისუფლების სათავეში კვლავ ბიძინა ივანიშვილი დგას. პარლამენტის მხრიდან `კვერის დაკვრა~ და მთელი პოლიტიკური ისტებლიშმენტის `ფეხის აყოლა~ მიანიშნებს იმაზე, რომ, რაც ბიძინა ივანიშვილმა ბრძანა, მართალია. ეს წარმოსახვა ასეთია: თავში ზის ის და დანარჩენები _ განშტოებებში. ამის გარდა, არის მეორე საკითხიც: უშეცდომო არავინ არის და რატომ გვაქვს ასეთი წარმოდგენა, რომ მაინცდამაინც ბიძინა ივანიშვილმა უნდა გააკეთოს კომენტარი კონსტიტუციის განმარტებებზე, როცა ეს კაცი არ არის კონსტიტუციონალისტი და ამ საქმის სპეციალისტი. ბიძინა ივანიშვილი აცხადებს, საპარლამენტო რესპუბლიკა ვართო, და არ გვაქვს, ბატონო, საპარლამენტო რესპუბლიკა! როცა პრეზიდენტი არის არჩევითი, არ შეიძლება ვილაპარაკოთ ცალსახა საპარლამენტო რესპუბლიკის მოდელზე, ეს არის თავსმოხვეული სიცრუე და ამას ჩვენ ვუსმენთ, ტაშს ვუკრავთ და მიგვაჩნია, რომ ჭეშმარიტებაა. სადამდე შეიძლება ასე გაგრძელება, როცა კონსტიტუცია მოქმედებს, იურიდიულად არსებობს დოკუმენტი და მაინცდამაინც, სანამ ლიდერი არ იტყვის, მანამდე კონსტიტუცია არ მუშაობს. ასეთი გაუგებრობაა ქვეყანაში და გული მწყდება, რომ უკან მიდის იგივე კონსტიტუციური და პოლიტიკური მართლშეგნება, ვიდრე უწინ იყო. ვფიქრობ, ედუარდ შევარდნაძის შემდეგ საქართველოში დემოკრატია არ ყოფილა. სულ არის ფასადი და ტრიალი მოჯადოებულ წრეში, არსებობს ლიდერის ფაქტორი, რასაც ის იტყვის, ის არის სიმართლე. ლიდერის ფაქტორი კი, თავის მხრივ, ძალაუფლებაში მდგომარეობს. როცა ძალაუფლებას ფლობ, ყველა გისმენს, ბიძინა ივანიშვილი ძალაუფლებას რომ არ ფლობდეს, არავინ მოუსმენდა და არც აყვებოდა, მაგრამ რეალურ ხელისუფლებას ფლობს და ამიტომაც ყველა მას ემორჩილება", - აცხადებს გელბახიანი.