დღეს, 12 სექტემბერს 12:30 საათზე სასტუმრო „თბილისი მარიოტში "საქართველოს რეფორმების ასოციაცია" მართავს პროექტის - „საქართველოს უმაღლესი განათლების დაწესებულებებში სოციალური მეცნიერებების სფეროში კვლევის ხელშეწყობის საშუალებების ანალიზი"- შემაჯამებელ ღონისძიებას. მრგვალი მაგიდის ფორმატში დაგეგმილია პროექტის ფარგლებში შემუშავებული პუბლიკაციის/ანალიტიკური დოკუმენტის პრეზენტაცია.
ანალიტიკური დოკუმენტი შეიქმნა რვა თვიანი მუშაობის შედეგად , საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამის (EWMI G-PAC-ის) ფინანსური მხარდაჭერით. პროექტის ფარგლებში 7 მკვლევარმა შეისწავლა სოციალურ მეცნიერებებში აკადემიური კვლევის არსებულ მდგომარეობა, შეაფასა ბოლო 4 წლის განმავლობში მიღწეულ პროგრესი, მთავარ პრობლემები და გამოწვევები. კვლევის შედეგებზე დაყრდნობით კი შემუშავებული იქნა სათანადო რეკომენდაციები, რაც წარმოდგენილია საბოლოო პუბლიკაციის/ანალიტიკური დოკუმენტის სახით.
ღონისძიებას დაესწრებიან საქართველოს განათლებისა და მეცნიერების სამინისტროს, საქართველოს პარლამენტის განათლების, მეცნიერებისა და კულტურის კომიტეტის, აგრეთვე სახელმწიფო და კერძო უმაღლესი სასწავლებლების, კვლევითი ინსტიტუტებისა და დონორი ორგანიზაციების წარმომადგენლები. შეხვედრის მიზანია პროექტის ბენეფიციარებთან ერთად კვლევის მიგნებებისა და შემუშავებული რეკომენდაციების განხილვა და ანალიზი.