ქვეყანაში არსებულ კრიმინოგენულ ვითარებას საზოგადოება „ივერია" საგანგებო ბრიფინგზე გამოეხმაურა.
საზოგადოება „ივერიის" ოფისში გრიგოლ ვაშაძემ, მამუკა გამყრელიძემ და ნოდარ ხარშილაძემ ქვეყანაში დამძიმებული კრიმინოგენული ვითარების შესახებ ისაუბრეს.
საზოგადოება „ივერიას" მიაჩნია, რომ დღეს შექმნილი მდგომარეობა საფრთხეს უქმნის საქართველოს მოქალაქეების უსაფრთხოებას და სტატისტიკა, რომელზეც ოფიციალური უწყებები საუბრობენ, რეალურად არ ასახავს არსებულ სურათს.
ბრიფინგზე ასევე საუბარი იყო საზოგადოებრივ პასუხისმგებლობაზე, რომელსაც საზოგადოების ყველა წევრი უნდა აცნობიერებდეს, პოლიტიკური გემოვნებისა და შეხედულებების მიუხედავად.
„დაუსჯელობის სინდრომის კვლავ დაბრუნება, ქუჩებში შეიარაღებული ადამიანების თარეში, საერთო სახელმწიფოებრივი ინტერესებისთვისაა საზიანო და არა რომელიმე პოლიტიკური დაჯგუფებისთვის", - აღნიშნა ბრიფინგზე.
ბრიფინგზე ასევე გაესვა ხაზი შინაგან საქმეთა სამინისტროსა და სამართალდამცავი ორგანოების არასაკმარის და არაეფექტურ მუშაობას, სახელისუფლებო რიტორიკით კრიმინალის პრაქტიკულად წახალისებას, რამაც, საბოლოო ჯამში კრიმინალისა და ძალადობის ზრდის სწრაფ ტემპამდე მიგვიყვანა.
საზოგადოება „ივერია" გამოვიდა ასევე ინიციატივით, გაიხსნას სადისკუსიო სივრცე ამ პრობლემაზე საჯარო მსჯელობისათვის, რათა საზოგადოების აქტიურმა და პროგრესულად მოაზროვნე ნაწილმა ხელისუფლებას, არსებული კრიზისიდან ოპტიმალური და კონკრეტული გამოსავალი შესთავაზოს.