მიგრაციის პოლიტიკის განვიტარების ცენტრი „უცხოელთა და მოქალაქეობის არმქონე პირთა სამართლებრივი მდგომარეობის შესახებ" საქართველოს კანონში 1 სექტემბრიდან ამოქმედებულ ცვლილებებს ეხმაურება და ამ საკითხზე განცხადებას ავრცელებს. განცხადებაში აღნიშნულია, რომ ახალი კანონ, რომელიც ევროპულ სტანდარტებს ესადაგება, საქართველოს მთავრობას უმართავი მიგრაციული ნაკადების თავიდან აცილების, ან მნიშვნელოვნად შემცირების შესაძლებლობას მისცემს და ამავე დროს მიგრაციის ეფექტიანი, ქმედითი და მიზანმიმართული პოლიტიკის განხორციელებას უზრუნველყოფს.
„მიგრაციის პოლიტიკის განვითარების საერთაშორისო ცენტრი (ICMPD) აქტიურად აკვირდება საქართველოს იმ სამთავრობო დაწესებულებათა მიერ მიღწეულ მნიშვნელოვან პროგრესს, რომლებიც მიგრაციის პოლიტიკის განვითარებასა და განხორციელებაში არიან ჩაბმულნი. ამ მიმართულებით გადადგმულ მნიშვნელოვან ნაბიჯს წარმოადგენს კანონის მიღება, რომელიც ძალაში 2014 წლის 1 სექტემბერს შევიდა.
ამ ახალი კანონის მიღება საქართველოში ახალ რეალობას ჰქმნის, კერძოდ, საქართველოს სავიზო პოლიტიკაში მას ახალი რეგულაცია შემოაქვს. სახელმწიფოსთვის გადამწყვეტი მნიშვნელობა ენიჭება მიგრაციასთან დაკავშირებული ყველა საკითხის ეფექტიანად გადაწყვეტას, მათ შორის, არარეგულარული მიგრაციის სამართავად მიღებულ ზომებს. მნიშვნელოვანია, რომ საქართველოში არ შეფერხდეს უცხოელთა ლეგალური შემოსვლა, რომლებსაც, ქვეყნის ეკონომიკური, დემოგრაფიული, სოციალური და კულტურული განვითარების თვალსაზრისით, პოზიტიური როლის შესრულება შეუძლიათ. აქედან გამომდინარე, კანონის შემუშავების პროცესში, საქართველოს მთავრობის მთავარ პრიორიტეტს სწორედ ამგვარი დაბალანსებული მიდგომის შემუშავება წარმოადგენდა. ახალი კანონი სავიზო პოლიტიკისა და იმიგრაციის პროცესების მიმართ ქვეყანაში არსებულ საერთო მიდგომას ასახავს, და იმ წესებსა და ნორმებს განსაზღვრავს, რომელთა მიზანია უზრუნველყოს საქართველოში უცხოელ მოქალაქეთა ლეგალური შემოსვლა და ყოფნა, საქართველოს კონსტიტუციით გარანტირებული უფლებებისა და თავისუფლებების, ასევე საერთაშორისო სამართლის საყოველთაოდ აღიარებული პრინციპებისა და ნორმების დაცვით.
ამ რეგულაციების ევროკავშირის სავიზო რეჟიმის ლიბერალიზაციის სამოქმედო გეგმასთან შესაბამისობაში მოყვანა ხელს შეუწყობს ევროპული სტანდარტების საკანონმდებლო, მარეგულირებელი და ინსტიტუციონალური ჩარჩოს შექმნას. ეს კი საქართველოს მთავრობას უმართავი მიგრაციული ნაკადების თავიდან აცილების, ან მნიშვნელოვნად შემცირების შესაძლებლობას მისცემს და ამავე დროს მიგრაციის ეფექტიანი, ქმედითი და მიზანმიმართული პოლიტიკის განხორციელებას უზრუნველყოფს