27 ივნისს, ასოცირების შეთანხმების ბრიუსელში ხელმოწერის დღეს, იუსტიციის მინისტრ თეა წულუკიანის მიერ გამოთქმული ინიციატივის შესაბამისად, საქართველოს იუსტიციის სამინისტროში ევროკავშირის სამართლის დეპარტამენტი შეიქმნა. ამის შესახებ დადგენილება საქართველოს მთავრობამ 26 აგვისტოს მიიღო. სამინისტროს ახალ სტრუქტურულ ერთეულში, რომელიც ევროპულ კანონებთან საქართველოს კანონმდებლობის დაახლოებაზე იმუშავებს, თანამშრომელთა შესარჩევად ღია კონკურსი ცხადდება. მასში მონაწილეობის მიღება ყველა მსურველს შეუძლია, ვინც საკვალიფიკაციო მოთხოვნებს აკმაყოფილებს.
ევროკავშირის სამართლის დეპარტამენტის შექმნა საქართველოს მიერ ევროკავშირთან ასოცირების შეთანხმებით გათვალისწინებული ვალდებულებების შესრულების საჭიროებამ განაპირობა. დეპარტამენტი ევროკავშირის სამართლის კვლევით იქნება დაკავებული და მასთან საქართველოს კანონმდებლობის დაახლოების მეთოდიკასა და პრინციპებს შეიმუშავებს; გააანალიზებს ევროპული სამართლის წყაროებთან ქართული კანონმდებლობის შესაბამისობას და, საჭიროების შემთხვევაში, იუსტიციის სამინისტროს შესაბამის დეპარტამენტებს საკანონმდებლო ცვლილების ინიციატივით მიმართავს; მონაწილეობას მიიღებს ასოცირების შეთანხმების იმპლემენტაციის მიზნით შექმნილ სამთავრობო საკოორდინაციო მექანიზმში; ევროკავშირსა და საქართველოს შორის დადებული ასოცირების შეთანხმების საფუძველზე შექმნილ ორგანოში - ასოცირების საბჭოში, განახორციელებს სამინისტროს წარმომადგენლის სამდივნოს ფუნქციებს.
დაწვრილებითი ინფორმაციის ნახვა ვაკანსიით დაინტერესებულ პირებს იუსტიციის სამინისტროს ვებგვერდებზე - justice.gov.ge და hr.gov.ge შეუძლიათ.