31 აგვისტოს 13:00 საათზე საქართველოს პარლამენტის ეროვნული ბიბლიოთეკის საგამოფენო დარბაზში ზედოზირებაზე ცნობიერების ამაღლების მსოფლიო დღესთან დაკავშირებით საჯარო ლექციების სერიის ფარგლებში დისკუსია გაიმართება.
მოწვეული სტუმრები: იუსტიციის მინისტრი თეა წულუკიანი, შრომის, ჯანმრთელობისა და სოციალური დაცვის მინისტრის მოადგილე მარიამ ჯაში, შინაგან საქმეთა სამინისტროს აკადემიის პრორექტორი სოფო კილაძე, არასამთავრობო ორგანიზაცია „ახალი ვექტორის" დირექტორი კოკა ლაბარტყავა და ექიმი-ნარკოლოგი ხათუნა თოდაძე აუდიტორიასთან ერთად ზედოზირების პრობლემაზე და მის პრევენციაზე ისაუბრებენ.
ყოველწლიურად მსოფლიოში დაახლოებით 183 000-მდე ადამიანი იღუპება ზედოზირების გამო და მათ შორის ყველაზე მეტი ოპიოიდური ზედოზირებით.
ალბათ, ყველას გვახსოვს ბრაიან ადამსი, ელვის პრესლი, ემი ვაინჰაუსი, კურტ კობეინი, ბილი ჰოლიდეი, ჯუდი გარლანდი და ანა ნიკოლ სმიტი - ამ ადამიანებს არამხოლოდ ჰოლივუდი, არამედ ფსიქოაქტიური ნივთიერებებით ზედოზირებით სიკვდილიც აკავშირებთ ერთმანეთთან. ზედოზირებით გარდაცვალების მიზეზებს შორის არის ზედოზირების ნიშნების არცოდნა, სტიგმა, ხელმისაწვდომობა დროულ სამედიცინო დახმარებაზე, რეპრესიული ნარკორეგულირება, ზიანის შემცირების სერვისების ნაკლებობა და სხვა.
საქართველოს ზიანის შემცირების ქსელის მიერ ჩატარებული კვლევით: 30-35 წ. ასაკის მომხმარებელთა 26.7% ჰქონია ზედოზირების შემთხვევა ბოლო 6 თვეში; ზედოზირების შემთხვევას შეესწრო გამოკითხულთა 42.1%; სასწრაფო კი მხოლოდ 15.80%-მა გამოიძახა.
2014 წელს საქართველოს მთავრობამ ზედოზირების შემთხვევაში პაციენტთა სიცოცხლის გადასარჩენად გამოძახებისას, სასწრაფო სამედიცინო სამსახურს პოლიციისთვის შეტყობინების ვალდებულება მოუხსნა და ასეთი შემთხვევების დაფინანსება საყოველთაო ჯანდაცვის პროგრამაში შეიტანა რითაც მოხსნა ბარიერი სამედიცინო მომსახურებაზე.
როგორია ზედოზირების სტატისტიკა საქართველოში? რამდენი ადამიანი იღუპება და რა მიზეზით? რატომ გადადგა მთავრობამ ნაბიჯი, რომელსაც არასამთავრობო ორგანიზაციები ათწლეულია ითხოვდნენ? რამდენად მზად არის სასწრაფო სამედიცინო დახმარების სამსახური ასეთ შემთხვევებზე რეაგირებისთვის? რა არის ზედოზირების ნიშნები და რა უნდა გააკეთოთ თუ თქვენს მეგობარს ასეთ მდგომარეობაში აღმოაჩენთ?
ამ და სხვა კითხვებს თქვენთან ერთად მთავრობის, ექსპერტული წრეების და არასამთავრობო ორგანიზაციების წარმომადგენლები, ასევე სასწრაფო სამედიცინო დახმარების ექიმები უპასუხებენ.
მასალის გამოყენების პირობები
მასალის გამოყენების პირობები