გერმანული გამოცემა „ნორდვესტ ცაიტუნგის" მიერ გამოქვეყნებულ სტატიაში გადმოცემულია გერმანიაში, ქვემო საქსონიის ქალაქ ბარსელში მცხოვრები ქართული ოჯახის დრამა, რომელსაც ქვეყნიდან დეპორტაცია ემუქრება (ავტორი მელანი ჯეპსენი).
„მძიმე გზა ელოდებათ წინ ცხრა წლის თამარს, მის ორ და-ძმას და მშობლებს. თამარი ოთხი წლისა იყო, როცა მისი ოჯახი საქართველოდან გერმანიაში ჩამოვიდა. მისი და-ძმა - მარიამი და ალიკა უკვე გერმანიაში დაიბადნენ. ოჯახი 2009 წლიდან ბარსელში ცხოვრობს და მათ ახლა თავიანთ სამშობლოში - საქართველოში დეპორტაცია ემუქრებათ. ბარველელი პოლიტიკოსები და ადგილობრივი ლუთერანული ეკლესია მათ დახმარებას ცდილობენ. რამდენიმე თვის წინ, თებერვალში, მათ უკვე ნაწილობრივ გამარჯვებას მიაღწიეს: ქვემო საქსონიის კომისიამ, რომელიც იმიგრაციის საკითხებში განსაკუთრებული შემთხვევებს იხილავს, გადაწყვიტა, რომ ეს საქმე კონტროლქვეშ აეყვანა.
„სიტუაცია ცოტა განიმუხტა", - ამბობს თომას ფარცელი, ევანგელისტურ-ლუთერანული ეკლესიის პასტორი, რომელიც ქართულ ოჯახს მფარველობს. სულ ახლახანს უფროსი შვილი თამარი დასასვენებელი ბანაკიდან დაბრუნდა...
ქართული ოჯახი კონფლიქტის ზონიდანაა გამოქცეული. ოჯახის უფროსმა პეტრე ბ.-მ საკუთარი თვალით ნახა, როგორ მოკლეს მისი მოხუცი მამა ოსმა ბოევიკებმა.
ჯერ-ჯერობით გაურკვეველია, დარჩება თუ არა ქართული ოჯახი გერმანიაში მუდმივად საცხოვრებლად: „დოკუმენტები ჰანოვერშია გადაგზავნილი, მაგრამ ისინი შინაგან საქმეთა სამინისტროს და ქვემო საქსონიის კომისიას ჯერ კიდევ არ განუხილავს", - ამბობს ფრანკ ბუმკერი, მუნიციპალური პრეს-მდივანი, - თუმცა არის მცირე გამოსავალი: თუ ოჯახი დასაბუთებულ თხოვნას დაწერს, ამ შემთხვევაში მათი დროებითი ყოფნის ვადა 2015 წლის თებერვლამდე შეიძლება გაგრძელდეს".
მასალის გამოყენების პირობები