საქართველოს იუსტიციის მინისტრი თეა წულუკიანი ამბასადორიალის მონაწილეებს შეხვდა. თეა წულუკიანმა დიპლომატების წინაშე გამოსვლისას იმ რეფორმებზე ისაუბრა, რომელთაც იუსტიციის სამინისტრო ბოლო წლების განმავლობაში ახორციელებს.
თავის გამოსვლაში იუსტიციის მინისტრმა სისხლის სამართლის რეფორმასა და და მართლმსაჯულების მეორე ტალღაზე გაამახვილა ყურადღება. თეა წულუკიანმა მისიების ხელმძღვანელებსა და სტუმრებს მართლმსაჯულების მეორე ტალღის შესახებ დეტალური ინფორმაცია მიაწოდა, რაც მოსამართლეებისათვის შეფასების კრიტერიუმების შემოღებას ითვალისწინებს.
იუსტიციის მინისტრმა დიპლომატიური კორპუსის წარმომადგენლებს, ასევე, განუმარტა საპროცესო შეთანხმების ახალი რეგულაციები.
თეა წულუკიანმა სხვადასხვა ქვეყანაში ინვესტიციების მოზიდვის კუთხით მომუშავე დიპლომატებს საარბიტრაჟო რეფორმის შესახებ ინფორმაცია მიაწოდა და განუმარტა, რომ ამ რეფორმის შედეგად დავების გამარტივების მიზნით საქართველოს საერთაშორისო სტანდარტის შესაბამისი კანონმდებლობა ექნება; ეს კი ბიზნესს საქმის წარმოებას მნიშვნელოვნად გაუადვილებს.
ამასთან, მინისტრმა ისაუბრა ღია მმართველობის შესახებაც და აღნიშნა, რომ საქართველო 64 ქვეყანას შორის ღია მმართველობის პარტნიორობის სამეთვალყურეო კომიტეტის წევრად 7 ქვეყანასთან ერთად აირჩიეს.
მინისტრის განცხადებით, ეს იმის მანიშნებელია, რომ საქართველოში მმართველობის სფეროში ღიაობისა და გამჭვირვალობის ძალიან მაღალი მაჩვენებელია.
იუსტიციის მინისტრმა ადამიანის უფლებათა დაცვის კუთხით განხორციელებულ არაერთ რეფორმაზე გაამახვილა ყურადღება; ასევე, დიპლომატებს მიაწოდა ინფორმაცია რამდენიმე ქვეყანასთან წარმოებულ წარმატებულ მოლაპარაკებებზე, რომლებიც იუსტიციის სახლის კონცეფციის ექსპორტს ეხება.
ამბასადორიალი გუშინ გაიხსნა. მისი მონაწილეები დღეს აღმასრულებელი და საკანონმდებლო ხელისუფლების წარმომადგენლებს ხვდებიან.
იუსტიციის მინისტრმა თეა წულუკიანმა ქართველ დიპლომატებს საქართველოში მიმდინარე დემოკრატიულ რეფორმებზე, სასამართლო სისტემაში განხორციელებულ ცვლილებებსა და საქართველოში ადამიანის უფლებების დაცვის კუთხით მთავრობის მიერ გადადგმულ ნაბიჯებზე ინფორმაცია უკვე მიაწოდა. დიპლომატებს ინფორმაციას გააცნობენ, ასევე, პარლამენტის ვიცე-სპიკერი მანანა კობახიძე, სახალხო დამცველი, საპარლამენტო უმცირესობისა და უმრავლესობის წარმომადგენლები.
