არასამთავრობო ორგანიზაცია „ადამიანი კანონი თავისუფლება"-ს თავმჯდომარემ გიორგი ჭულუხაძემ და ორგანიზაციის აღმასრულებელმა დირექტორმა ნიკოლოზ მაღალდაძემ საქართველოს რეგიონალური განვითარებისა და ინფრასტრუქტურის სამინისტროს, ინფრასტრუქტურის განვითარების დეპარტამენტის უფროსის მოადგილესთან ქ-ნ ირინა ჭეიშვილთან შეხვედრა გამართა. შეხვედრაზე განხილულ იქნა საქართველოს მთავრობის პროექტის ფარგლებში მოსკოვის გამზირზე უსახლკაროთა თავშესაფარში მცხოვრებ მიუსაფართათვის კაპიტალური საცხოვრებლის მშენებლობის საკითხი.
როგორც ქალბატონმა ირინამ ორგანიზაციის წევრებთან საუბარში აღნიშნა „მუნიციპალური განვითარების ფონდი" ასრულებს შენობის პროექტირებას და უახლოესი 10 დღის ვადაში სამინისტროს მიეწოდება შენობის პროექტი. ახალი სოციალური სახლი გათვლილი იქნება 240 ბენეფიციარზე და სახელმწიფოს მისი მშენებლობა სავარაუდოდ ორი მილიონზე მეტი დაუჯდება. აღნიშნული სახლი იქნება ევროპულ სტანდარტებთან მიახლოებული, ასევე სამინისტრო უდიდეს მნიშვენლობას მიანიჭებს შენობის კაპიტალურობასა და მდგრადობას. აღსანიშნავია ის ფაქტი, რომ დადგინდება ბენეფიციარად აღიარების სტანდარტები, რაც ხელს შეუწყობს სოციალურ სახლში უტყუარად საჭიროების მქონე ადამიანების მოხვედრას.
ინფრასტრუქტურის სამინისტროს ინიციატივით, როგორც კი მოხდება სოციალური სახლის ასაშენებლად გათვლილ ტერიტორიაზე ინფრასტრუქტურის მოწესრიგება, მშენებლობის პროცესში ყველა შრომისუნარიან ბენეფიციარს, რომელიც ამჟამად განთავსებულია ე.წ. „კარვების ქალაქში", მიეცემა მშენებლობაში დასაქმების საშუალება, რაც მათ შემოსავლის წყაროს გაუჩენს.
დაიგეგმა არასამთავრობო ორგანიზაცია „ადამიანი კანონი თავისუფლება"-სა და ინფრასტრუქტურის სამინისტროს წარმომადგენლების ერთობლივი გასვლა და მონახულება იმ ტერიტორიისა, სადაც უნდა განთავსდეს შენობა.
ორგანიზაცია პროექტს მიმდინარეობის მონიტორინგს მიუსაფართა კარვებში განთავსების დღიდან ახორციელებს, რასაც გააგრძელებს მომავალში, როგორც ბენეფიციართა სოციალურ სახლში შესახლებამდე, ასევე მას შემდეგაც.
