,, არჩევნებისა და პოლიტიკური ტექნოლოგიების კვლევის ცენტრის" დირექტორი კახა კახიშვილი იუსტიციის სამინისტროს ინიციატივას შეკრებითობის პრინციპის დაბრუნების შესახებ ,, ჯი-ეიჩ-ენთან” საუბარში პოზიტიურად აფასებს და აცხადებს, რომ შეცდომა იყო როცა სასჯელის უპირობო შეკრების პრინციპიდან უპირობო შთანთქმის პრინციპზე გადავედით.
,, ვფიქრობ, რომ იუსტიციის სამინისტროს ინიციატივა სავსებით კარგია. ჩემი აზრით, შეცდომა იყო როცა სასჯელის უპირობო შეკრების პრინციპიდან გადავედით უპირობო შთანთქმის პრინციპზე. მოსამართლეს უნდა ჰქონდეს შესაძლებლობა თავად გადაწყვიტოს გამოიყენოს სასჯელის შთანთქმის, თუ შეკრებითობის პრინციპი. თუმცა ამ ყველაფერს სჭირდება კარგი გაწერა რათა ეს ყველაფერი დამოკიდებული არ იყოს მოსამართლის პირად რწმენაზე.ამიტომ დასადგენი იქნება კრიტერიუმები როდის შეეძლება მოსამართლეს სასჯელის შთანთქმის, ან შეკრებითობის პრინციპი გამოიყენება", _განაცხადა ,,ჯი-ეიჩ-ენთან" საუბარში კახიშვილმა.
შეგახსენებთ, რომ სასჯელთა შეკრებითობის პრინციპი შესაძლოა კვლავ ამოქმედდეს. კანონპროექტს იუსტიციის სამინისტრო ამზადებს. როგორც უწყებაში განმარტავენ, პროექტის მომზადება დღის წესრიგში სასამართლო პრაქტიკის და იმ პრობლემების გათვალისწინებით დადგა, რაც სასჯელთა შეკრებითობის პრინციპის გაუქმებამ და ძალაში მხოლოდ შთანთქმის პრინციპის დატოვებამ გამოიწვია.
