„ერთიანი ნაციონალური მოძრაობის" ერთ-ერთი ლიდერი გიგი წერეთელი საქართველოს პარლამენტის დელეგაციასთან ერთად ბაქოში იმყოფება, სადაც ეუთოს საპარლამენტო ასამბლეის ყოველწლიური სესია იმართება.
სესიის მუშაობაში უეთოს რეგიონის 57 ქვეყნის 300-მდე პარლამენტის წევრი მონაწილეობს. დაგეგმილია რეზოლუციის მიღება, რომელშიც ევროპის უსაფრთხოებისა და თანამშრომლობის მნიშვნელოვანი საკითხები აისახება.
კონფერენციის გახსნაზე მონაწილეებს სიტყვით პრეზიდენტმა ალიევმა და აზერბაიჯანის პარლამენტის თავმჯდომარემ მიმართეს, ასევე შვეიცარიის პრეზიდენტმა და ეუთოს მოქმედმა თავმჯდომარემ დიდიერ ბურკჰარტერმა.
სესიის მიმდინარეობის დროს დაგეგმილია სპეციალური დებატები უკრაინაში არსებულ ვითარებაზე, რისთვისაც მოწვეულია რუსეთის დუმის თავმჯდომარე სერგეი ნარიშკინი და უკრაინის რადას თავმჯდომარის მოადგილე რუსლან კოშულინსკი. ასევე ინიცირებულია რეზოლუცია რუსეთის მიერ ჰელსინკის პრინციპების უხეშად დარღვევის თაობაზე და დოკუმენტთა პაკეტი, რომელიც განხილული იქნება ასამბლეის კომიტეტების მიერ უსაფრთხოების, ეკონომიკური თანამშრომლობისა და ადამიანის უფლებათა დაცვის თემებზე.
რუსეთის დელეგაციის წარმომადგენელმა, ალექსეი პუშკოვმა პირველივე სხდომაზე, უკრაინაში რუსეთის მიერ განხორციელებული მოქმედებების შესახებ, ამერიკელი სენატორის ბენ კარდინის მიერ ინიცირებული რეზოლუციის დღის წესრიგიდან მოხსნა მოითხოვა, რასაც დებატები მოჰყვა. აღნიშულ თემაზე სიტყვით გიგი წერეთელი გამოვიდა, რომელმაც რეზოლუციის მიღების აუცილებლობას დაუჭირა მხარი და აღნიშნა, რომ თუკი რუსეთი არ მიიღებს შეფასებას და პასუხს იმასთან დაკავშირებით, რაც დღეს აღმოსავლეთ უკრაინაში ხდება, მისი მოქმედებები გაგრძელდება და საფრთხეს მთლიანობაში ევროპის უსაფრთხოებას შეუქმნის. მინი განცხადებით, 2008 წელს ჰელსინკის პრინციპების უხეშ დარღვევას და რუსეთი საქართველოში შემოჭრას, შესაბამისი და ეფექტური რეაგირება მსოფლიოს მხრიდან არ მოჰყოლია. სწორედ ამიტომ განახორციელა რუსეთმა უკრაინაში მსგავსი ქმედებები. საჭიროა სწორი პილიტიკური შეფასება და მკაცრი რეაგირება იმისათვის, რომ მოხდეს მსგავსი მოქმედებების პრევენცია და არა ფიქრი იმაზე, გაღიზიანდება თუ არა რუსეთი ამგვარი შეფასებებით თუ რეზოლუციების მიღებით.
საბოლოო კენჭისყრაზე საპარლამენტო ასამბლეამ არსებული რეზოლუცია დღის წესრიგში განხილვისა და შემდგომი დამტკიცებისათვის დატოვა. ეუთოს საპარლამენტო ასამბლეის ძირითადი რეზოლუციის პროექტში შეტანილია ჩანაწერი აფხაზეთსა და ცხინვალის რეგიონში დევნილთა ღირსეულად დაბრუნების შესახებ და ასევე საქართველოში ეუთოს მისიის აღდგენის თაობაზე. საქართველოს დელეგაციის მიერ ინიცირებულია რამდენიმე პუნქტი, რომელიც ეხება რუსეთის მიერ შეუსრულებელ ვალდებულებას, საქართველოს ტერიტორიის დეოკუპაციას და საპარლამენტო კონტროლის გაძლიერებას შეიარაღებაზე. ეს ინიციატივები განხილული იქნება შესაბამის კომიტეტებში და საბოლოოდ ასამბლეა კენჭს უყრის ძირითად დოკუმენტში შესატანად.
გიგი წერეთელი, როგორც ეუთოს საპარლამენტო ასამბლეის პრეზიდენტი, საპარლამენტო ასამბლეის გენერალურ მდივანს რანკო კრივოკაპიჩს შეხვდა. ასევე ფინეთის, თურქეთის, უკრაინის, შვედეთის, აზერბაიჯანის დელეგაციის წარმომადგენლებს.
ასამბლეის მუშაობის გაგრძელება დაგეგმილია 2 ივლისამდე და დასრულდება ასამბლეის პრეზიდენტისა და სხვა თანამდებობის პირების არჩევით.
საქართველოს დელეგაციას შემადგენლობაში არიან ვიქტორ დოლიძე, ზურაბ აბაშიძე და ლევან ბეჟაშვილი.