საიამ გუშინ ჩატარებული 2014 წლის 15 ივნისის ადგილობრივი თვითმმართველობის არჩევნების განმეორებითი კენჭისყრის შედეგები შეაფასა. როგორც ორგანიზაციაში აცხადებენ კენჭისყრის, ხმის დათვლისა და შედეგების შეჯამების პროცესი მშვიდ ვითარებაში მიმდინარეობდა და მნიშვნელოვან დარღვევებს ადგილი არ ჰქონია.
მათივე ინფორმაციით, ძირითადად დაფიქსირდა ტექნიკური ხასიათის დარღვევები, რომლებზეც საიას დამკვირვებლებმა დაწერეს 2 (1) საჩივარი და 8 შენიშვნა დააფიქსირეს ჩანაწერთა წიგნში. რვავე შემთხვევაში საიას დამკვირვებლის შენიშვნები გათვალისწინებული იქნა, რის გამოც საჩივრები აღარ დაიწერა. საჩივრები და შენიშვნები ძირითადად შეეხებოდა შემდეგ დარღვევებს: უბნის არასათანადო მოწყობა - (4 შემთხვევა) წილისყრის პროცედურების დარღვევები - (1 შემთხვევა) არაუფლებამოსილი პირის ყოფნა უბანზე - (1 შემთხვევა); გადასატანი ყუთით ხმის მიცემასთან დაკავშირებული პრობლემები - (1 შემთხვევა); კომისიის წევრის მოვალეობების არაჯეროვანი შესრულება - (2 შემთხვევა) ხმის დათვლისა და შედეგების შეჯამების შემდგომ დაახლოებით 22:40 წუთზე ინციდენტი მოხდა ზუგდიდის #32 უბნის მიმდებარე ტეროტორიაზე. კერძოდ, საიას დამკვირვებლის ინფორმაციით, დაუდგენელი პირების მიერ მოხდა ცეცხლსასროლი იარაღიდან ჰაერში გასროლა, რასაც ადგილზე მღელვარება მოჰყვა.
საიას დამკვირვებლის ინფორმაციით, პოლიციამ ინციდენტში მონაწილე 3 პირი დააკავა. განმეორებითი კენჭისყრის დაკვირვების შედეგები აისახება 2014 წლის ადგილობრივი თვითმმართველობის არჩევნების მონიტორინგის მისიის შემაჯამებელ ანგარიშში. აღნიშნული ანგარიშის საფუძველზე საია საარჩევნო ადმინისტრაციასა და ხელისუფლებას მიაწვდის რეკომენდაციებს არჩევნების კიდევ უფრო დემოკრატიულ, თავისუფალ და სამართლიან გარემოში ჩატარების უზრუნველყოფის მიზნით.
ორგანიზაციის დამკვირვებლები განმეორებით კენჭისყრას აკვირდებოდნენ მარნეულის საარჩევნო ოლქის - №25 და №57 საარჩევნო უბნებზე, დუშეთის საარჩევნო ოლქის - №4, №6, №47 და №52 საარჩევნო უბნებზე, ახალქალაქის საარჩევნო ოლქის - №1 საარჩევნო უბანზე, ხონის საარჩევნო ოლქის - №22 საარჩევნო უბანზე, ტყიბულის საარჩევნო ოლქის - №2 და №5 საარჩევნო უბნებზე, ზუგდიდის საარჩევნო ოლქის - №32 საარჩევნო უბანზე, ბათუმის საარჩევნო ოლქის - №103 საარჩევნო უბანზე, ასევე ქობულეთის საარჩევნო ოლქის - №34 საარჩევნო უბანზე.
განმეორებითი კენჭისყრა 14 უბანზე გაიმართა, აქედან 6 უბანზე კენჭისყრა საიას საჩივრების დაკმაყოფილების შემდეგ ჩატარდა.