ხვალ,28 ივნისს, 12:00 საათზე, თბილისის ეროვნულ პარკში (საგურამო) საქართველოს ტურიზმის ეროვნული ადმინისტრაციის ორგანიზებით, დასუფთავების აქცია გაიმართება. ღონისძიების მთავარი მიზანია ზაფხულის სეზონზე ტურისტულად მიმზიდველი ადგილების დასუფთავება და ტურისტული აქტივობების პოპულარიზაცია.
თბილისის ეროვნული პარკის ტერიტორიაზე, გაეროს მსოფლიო ტურიზმის ორგანიზაციისა (UNWTO) და საქართველოს ტურიზმის ეროვნული ადმინისტრაციის (GNTA) ინიციატივით განხორციელდა პროექტი, რომელიც გულისხმობდა ბიომრავალფეროვნებაზე დაფუძნებული ველო ბილიკების განვითარებას. შესაბამისად, ამ ტერიტორიის დასუფთავება მნიშვნელოვანია აღნიშნული პროდუქტის გამართულად ფუნქციონირებისთვის, რაც თავის მხრივ ხელს შეუწყობს საქართველოს ეკოტურიზმის განვითარებას.
პროექტის ფარგლებში, მიმდინარე წლის ზაფხულის სეზონზე დაგეგმილია საქართველოს მასშტაბით ტურისტულად მიმზიდველ ადგილებში ყოველთვიური დასუფთავების აქციის ორგანიზება. ივნისის, ივლისისა და აგვისტოს თვეში ღონისძიების მონაწილეები დაასუფთავენ საქართველოს ტურისტულ ადგილებს. დასუფთავებაში მონაწილეობას მიიღებენ სკოლის მოსწავლეები, სტუდენტური თვითმართველობების წარმომადგენლები და სხვა დაინტერესებული პირებიც, რომელთა თავმოყრა ადმინისტრაციის სოციალური გვერდის საშუალებით მოხდება.