საქართველოს პარლამენტის დელეგაცია, ევროპასთან ინტეგრაციის კომიტეტის თავმჯდომარის, ვიქტორ დოლიძის ხელმძღვანელობით, ეუთოს საპარლამენტო ასამბლეის სხდომის მუშაობაში მიიღებს მონაწილეობას, რომელიც 28 ივნისიდან 2 ივლისამდე აზერბაიჯანის დედაქალაქში ჩატარდება.
ბაქოს სესიაზე განსაკუთრებული ყურადღება ისეთ აქტუალურ საკითხს დაეთმობა, როგორიცაა უსაფრთხეობის სფეროში არსებული სიტუაცია და რუსეთის ფედერაციის მხრიდან უკრაინაში ადამიანის უფლებების დარღვევის ფაქტები. სხდომებზე ასევე განიხილება პოლიტიკური, ეკონომიკური, გარემოს დაცვისა და ადამიანის უფლებების თემატიკა და დემოკრატიული ინსტიტუტების ჩართულობა.
ასამბლეის სამივე კომიტეტზე დისკუსიის შემდგომ შემუშავდება ერთიანი დეკლარაცია. საქართველოს პარლამენტის დელეგაციის, კონკრეტულად კი ვიქტორ დოლიძის ინიციატივით, განიხილება საქართველოსათვის აქტუალური ცვლილებების პროექტი, რომლის მხარდაჭერის შემთხვევაში, იგი „ბაქოს დეკლარაციაში" აისახება.
სესიებს 57 ქვეყნის 300-მდე პარლამენტის წევრი დაესწრება. საქართველოს საპარლამენტო დელეგაციას ვიქტორ დოლიძესთან ერთად პარლამენტის თავმჯდომარის მოადგილე ზურაბ აბაშიძე, პარლამენტის წევრი, ეუთოს საპარლამენტო ასამბლეის ვიცე-პრეზიდენტი გიორგი წერეთელი და პარლამენტის წევრი ლევან ბეჟაშვილი წარმოადგენენ.
