საჯარო რეესტრის ეროვნული სააგენტოს თავმჯდომარე პაპუნა უგრეხელიძე დასავლეთ საქართველოს ტერიტორიული სარეგისტრაციო სამსახურების თანამშრომლებს შეხვდა და მათ მუშაობას ადგილზე გაეცნო.
შეხვედრაზე სააგენტოს თავმჯდომარემ პირადად მოისმინა ის პრობლემები, რომლებსაც აჭარის, იმერეთისა და სამეგრელოს სარეგისტრაციო სამსახურების თანამშრომლები ყოველდღიური საქმიანობისას აწყდებიან. თავმჯდომარე დაინტერესდა, კონკრეტულად, რა ტიპის მხარდაჭერა სჭირდებათ სამსახურებს იმისთვის, რომ მოქალაქეებმა სერვისები სწრაფად და ხარისხიანად მიიღონ.
პაპუნა უგრეხელიძის განცხადებით, სააგენტოს მენეჯმენტი ყველაფერს აკეთებს, რათა ტერიტორიული ოფისების მუშაობა კიდევ უფრო გაუმჯობესდეს და მოქალაქეებისათვის გაწეული მომსახურების ხარისხიც გაიზარდოს.
„ჩვენი საზრუნავი რეგისტრაციის და ინფორმაციის ხარისხის სრულყოფა და მომხმარებელთა კმაყოფილებაა. სააგენტომ დგამს ქმედით ნაბიჯებს ერთიანი სარეგისტრაციო პოლიტიკის შემუშავებისკენ. ამ პროცესში კი მნიშვნელოვანია ტერიტორიული სამსახურების გამართული ფუნქციონირება, სარეგისტრაციო პრაქტიკის დახვეწა და სრულყოფა. ვცდილობთ, ამ პროცესში, რაიონის თანამშრომელთა შესაძლებლობები და ინტელექტუალური რესურსი სწორი მიმართულებით გამოვიყენოთ და მათი მოსაზრებები და შემოთავაზებები მაქსიმალურად გავითვალისწინოთ".
სააგენტოს თავმჯდომარემ თანამშრომლებთან ბოლო 6 თვის განმავლობაში განხორცილებული სამუშაოებიც შეაჯამა და ამ ეტაპისთვის პრიორიტეტულ საკითხზე - ტერიტორიული სარეგისტრაციო სამსახურებში განსახორციელებელ სამუშაოებზეც ისაუბრა.
სააგენტოს თავმჯდომარე საჯარო რეესტრის ყველა ტერიტორიული სამსახურის შემოვლას და ადგილზე მათი მუშაობის გაცნობას გეგმავს.
