4 მაისს კახეთში, ლოპოტას ტბაზე გაიმართა მსოფლიოში ყველაზე მასშტაბური საქველმოქმედო ღონისძიება - მსოფლიო რბენა „ფრთები სიცოცხლისათვის" (Wings For Life World Run). ღონისძიებაში არაერთი კერძო თუ სახელმწიფო ორგანიზაცია ჩაერთო.
აქციას იუსტიციის სამინისტროს საჯარო რეესტრის ეროვნული სააგენტოს 100-მდე თანამშრომელი შეუერთდა. მონაწილეებიდან საუკეთესო შედეგი ჯაბა ჭუმბურიძემ აჩვენა, რომელმაც მარათონი 17 კილომეტრის დაფარვის შემდეგ შეწყვიტა.
„საჯარო რეესტრი შეუერთდა სოციალური სოლიდარობის აქციას. ამ აქციაში მონაწილეობით გვინდა კიდევ ერთხელ გამოვხატოთ ყურადღება და თანადგომა გამოვუცხადოთ იმ ადამიანებს, ვისაც ეს ყველაზე მეტად სჭირდება. ჩვენთვის მთავარია, რომ მსოფლიო მარათონში მივიღეთ მონაწილეობა და მცირედი წვლილი შევიტანეთ იმ პირების დახმარების საქმეში, ვისაც დღეს გარკვეული მიზეზების გამო არ შეეძლო პროექტში მონაწილეობა. აქ მთავარი გამარჯვება და სირბილი არ არის, მთავარია მონაწილეობა, რომლითაც გამოვხატავთ ჩვენს მხარდაჭერას შშმ პირების მიმართ" - აცხადებენ საჯარო რეესტრში.
საქველმოქმედო ღონისძიებიდან შემოსული თანხა სრულად გადაეცემა ფონდს "Wings for Life", რომელიც აწარმოებს სამედიცინო და კლინიკურ კვლევებს ზურგის ტვინის დაზიანების სამკურნალოდ.
4 მაისს, დღის 2 საათზე, მსოფლიოს ხუთი კონტინენტის 40 ქვეყანაში, ათასობით ადამიანმა სტარტი ერთი მიზნისკენ აიღო - დაეხმარონ შეზღუდული შესაძლებლობების მქონე ადამიანებს. მსოფლიო სპორტის ისტორიაში ამ უპრეცენდენტოდ მასშტაბურ აქციას წელს საქართველოც შეუერთდა.
