19-21 აპრილს, იტალიაში ქართული საბრძოლო ხელოვნების ფედერაცია „შავფაროსნები" ქართულ კულტურას მსოფლიოში ერთ-ერთ ყველაზე ცნობილ და მასშტაბურ ფესტივალზე Natale di Roma-ზე წარადგენენ.
ფესტივალი Natale di Roma რომის დაარსებას ეძღვნება და იტალიაში რამდენიმე ათეული წელია საზეიმოდ აღინიშნება. Natale di Roma-ზე "შავფაროსნები" ქართული კულტურის რამდენიმე მიმართულებას წარადგენენ: საქართველოს საბრძოლო ისტორიას, ქართულ ისტორიულ იარაღს, ქართულ სამოსს და „ანსამბლ" „ჩვენებურებთან" ერთად შესრულებენ ქართულ სიმღერას.
"შავფაროსნების" მიერ წელს ფესტივალზე მებრძოლი ქართველი ქალის სახეც იქნება წარმოდგენილი, რადგანაც რომაელი ისტორიკოსების ცნობით, საქართველოში ლაშქრობისას პომპეუსს მამაკაცებთან ერთად ქართველი ქალებიც ებრძოდნენ.
NATALE DI ROMA -ზე იმ ქვეყნებს იწვევენ, რომლებთანაც რომის იმპერიას ისტორიული კავშირი ჰქონდა. 2012 წელს, „შავფაროსნების" წარმატებული გამოსვლის შემდეგ, ფესტივალის საორგანიზაციო ჯგუფის გადაწყვეტილებით, „შავფაროსნები" Natale di Roma-ს მუდმივი მონაწილეების სიაში მოხვდნენ.
პროექტი დაფინანსდა საქართველოს კულტურისა და ძეგლთა დაცვის სამინისტროს საერთაშორისო კულტურული პრეზენტაციის პროგრამიდან „ქართული სეზონი".
