როგორც ტაბატაძემ სპეციალურ პრესკონფერენციაზე განაცხადა, თურქეთის ტერიტორიაზე ტრანზიტული გავლისთვის დაწესებული საფასურის გადახდას დაექვემდებარება დროებითი ან უცხოური სანომრე ნიშნებისა და დახურული ძარის მქონე ყველა ის ავტოსატრანსპორტო საშუალება, განურჩევლად წონისა, რომლითაც შესაძლებელია ტვირთის ტრანსპორტორება.

"თურქეთის რესპუბლიკის ტრანსპორტის მინისტრის განკარგულებით, აღნიშნული შეეხება არა მხოლოდ საქართველოს, არამედ ყველა იმ ქვეყნის მოქალაქეს, მათ შორის თურქეთისას, რომელთა ავტოსატრანსპორტო საშუალებას დროებითი ან უცხოური სანომრე ნიშნები აქვთ", - განმარტა ტაბატაძემ.

მისივე განმარტებით, დატვირთული ავტოსატრანსპორტო საშუალებისთვის სატრანზიტო გავლის საფასური 1 200 ევროს, ცარიელი ავტომანქანებისთვის კი 600 ევროს შეადგენს.

"აღნიშნული გადაწყვეტილების გამო მნიშვნელოვანი პრობლემები შეექმნათ საქართველოს იმ მოქალაქეებს, რომლებიც ევროპის ქვეყნებში და ტვირთის გადასატანად გადაკეთებული ტრანზიტული ნორმების მქონე მიკროავტობუსებით მგზავრობდნენ თურქეთის გავლით საქართველოში. იმის გათვალისწინებით, რომ აღნიშნულის თაობაზე დროულად არ იყო ინფორმირებული ქართული მხარე და შესაბამისად, საქართველოს მოქალაქეები, თურქეთის რესპუბლიკის ტრანსპორტის სამინისტრომ გაითვალისწინა არსებული მდგომარეობა და გამონაკლისის სახით 2010 წლის 1-ელ მაისამდე საქართველოს მოქალაქეები ტრანზიტული გავლის საფასურის გადასახადისგან გაათავისუფლა, თუმცა 1-ელი მაისიდან აღნიშნული განკარგულება საქართველოს მოქალაქეებთან მიმართებაშიც ამოქმედდება", - განაცხადა საგარეო უწყების საკონსულო დეპარტამენტის დირექტორმა და აქვე განმარტა, რომ განკარგულება ძალაში 1 მარტიდან შევიდა.