ოფიციალური თბილისი იმედოვნებს, რომ აფხაზეთში ჩატარებულ ე.წ. საპრეზიდენტო არჩევნებს საერთაშორისო თანამეგობრობაც უკანონოდ შეაფასებს.
"ეს იყო უკანონო ქმედება და შესაბამისად, მისი შედეგებიც არალეგიტიმურია. იმედს ვიტოვებთ, ამ არჩევნებს მსოფლიო თანამეგობრობაც ადექვატურად შეაფასებს და მას დაგმობს", - განუცხადა ჟურნალისტებს აფხაზეთში ჩატარებულ ე.წ. საპრეზიდენტო არჩევნების საკითხზე კომენტირებისას საგარეო საქმეთა მინისტრის მოადგილე ნინო კალანდაძემ.
შეგახსენებთ, რომ სეპარატისტულ აფხაზეთში ე. წ. საპრეზიდენტო არჩევნები 12 დეკემბერს გაიმართა. საარჩევნო უბნები მოსკოვის დროით 08:00 საათზე გაიხსნა და 20:00 საათზე დაიხურა. აფხაზური ე. წ. კანონმდებლობის თანახმად, არჩეულად ითვლება კანდიდატი, რომელიც ამომრჩეველთა ხმების ნახევარს დააგროვებს.
სეპარატისტების ე. წ. ცესკოს მიერ შედგენილ სიაში 131 000 ამომრჩეველი იყო. სულ აფხაზეთში 35 საარჩევნო ოლქი და 174 უბანი მომქდებდა. საარჩევნო უბნები ასევე გახსნილი იყო მოსკოვსა და ჩერკესკში. ე. წ. აფხაზური ცესკოს თავმჯდომარის ბათალ ტაბაღუას ინფორმაციით, არჩევნებს მხოლოდ რუსეთიდან 80 დამკვირვებელი ესწრებოდა. მისი თქმით, დამკვირვებლები ასევე იყვნენ დსთ-ის ქვეყნებიდან, ევროპასა და აშშ-დან.
არჩევნებში სერგეი ბაღაფში ლიდერობს.