გურჯაანის რაიონის სოფელ ჭანდარში წმინდა გიორგის სახელობის ეკლესიას, რომელიც მე-9 საუკუნეშია აშენებული, ჭერი ჩამოექცა. როგორც სპეციალისტებმა კახეთის საინფორმაციო ცენტრს განუცხადეს, იმ შემთხვევაში, თუ ეკლესიას გამაგრებითი სამუშაოები სასწრაფოდ არ ჩაუტარდა, ტაძარი მთლიანად დაინგრევა.
ეკლესიის კედლები შუაზეა გახსნილი, ხვრელის სიგანე 10 სანტიმეტრს აღწევს. მიუხედავად იმისა, რომ ეკლესია, შესაძლოა, ნებისმიერ დროს დაინგრეს, ადგილობრივმა მაცხოვრებლებმა გუშინ ტაძარში მაინც ილოცეს.
გურჯაანის მუნიციპალიტეტის გამგეობაში განმარტეს, რომ ეკლესიის არც სარესტავრაციო და არც გამაგრებითი სამუშაოები მათ კომპეტენციაში არ შედის. კულტურული მემკვიდრეობისა და ძეგლთა დაცვის სააგენტოში კი განაცხადეს, რომ მიმდინარე წლის ბიუჯეტი თითქმის ამოწურულია.
