დრეზდენის მუზეუმის "მწვანე საცავიდან" მძარცველებმა 1 მლრდ ევრომდე ღირებულების საგანძური მოიპარეს.
მუზეუმის თანამშრომლებისა და ადგილობრივი პოლიციის ცნობით, ჯერ კიდევ მიმდინარეობს დადგენა, თუ რა რაოდენობისა და ღირებულების ძვირფასეულობა არის მოპარული.
ამჟამინდელი ინფორმაციით, გაძარცვულია საქსონიის კურფიუსტრის, ავგუსტ II ძლიერის საცავი.
ძვირფასეულობის კოლექცია, რომელიც მე-18 საუკუნეში ავგუსტ მე-2-ის მიერ არის შექმნილი, მოიცავდა ათეულობით ბრილიანტის, ლალის, ზურმუხტისა და საფირონის სამკაულებს.
მუზეუმის "მწვანე საცავი" ძარცვის შემდეგ დაიხურა. ადგილზე მუშაობს ათეულობით პოლიცია და ექსპერტ-კრიმინალისტები.
მუზეუმის დირექტორმა აღნიშნა, რომ საცავიდან მოპარულია ფასდაუდებელი ძვირფასეულობა.
"მოპარულ ნივთებს ხელოვნების ბაზარზე ლეგალურად ვერ გაყიდიან, რადგან ისინი ძალიან ცნობილია", - დასძინა დირექტორმა.
მისივე თქმით, უნიკალური კოლექციის კულტურული ღირებულება გაცილებით აღემატება მის მატერიალურ ღირებულებას.
მანამდე გერმანულმა გამოცემა Bild-მა დაწერა, რომ დაკარგული ძვირფასეულობის სავარაუდო ღირებულება 1 მლრდ ევროა.
