"პატრიოტთა ალიანსში" ამბობენ, რომ რუსეთში წასვლას აღარ გეგმავენ. დეპუტატი "პატრიოტთა ალიანსიდან" გიორგი ლომია ამბობს, რომ იმ ყველაფრის შემდეგ, რაც საქართველოში მოხდა, ეს ყველაფერი ჩაიშალა.
"ჩვენ არ ვგეგმავთ ჩასვლას მოსკოვში. იგეგმებოდა. ჩვენ მივიღეთ მოწვევა, მაგრამ საპარლამენტო საერთაშორისო ფორუმში კი არ უნდა მიგვეღო მონაწილეობა, იგეგმებოდა შეხვედრები, როგორც აფხაზურ მხარესთან, ასევე ოსურ მხარესთანაც. მე ვაპირებდი იმ ხალხთან შეხვედრას. სოხუმთან და ცხინვალთან დიალოგი აუცილებელია, ამაზე ვთანხმდებით. მაგრამ, იმ ყველაფრის შემდეგ, რაც საქართველოში მოხდა, ეს ყველაფერი ჩაიშალა", - თქვა ლომიამ.
შეგახსენებთ, რომ რუსული კომუნისტური პარტიის ლიდერმა და რუსეთის დუმის დსთ-ს საქმეთა კომიტეტის თავმჯდომარემ, ლეონიდ კალაშნიკოვმა თქვა, რომ ივლისში რუსეთში დაგეგმილ განვითარების საერთაშორისო ფორუმზე "პარლამენტარიზმის განვითარება" ჩასვლას ქართველი დეპუტატებიც გეგმავდნენ, კერძოდ კი "პატრიოტთა ალიანსის" წარმომადგენლები.
