"ტერიტორია, სადაც საინჟინრო სამუშაოები მიმდინარეობს, აზერბაიჯანის მიერ კონტროლირებადია", - ამის შესახებ განცხადება საგარეო საქმეთა მინისტრის მოადგილემ, ლაშა დარსალიამ, გააკეთა.
ის ამბობს, რომ ბაქოში სადელიმიტაციო კომისიის შეხვედრაზე მათ მოითხოვეს დეტალური ინფორმაცია ამ სამუშაოებთან დაკავშირებით და ამ ეტაპისთვის სამუშაოები შეჩერებულია.
„ეს არის ტერიტორია ქედს მიღმა, რომელზეც ამჟამად კონტროლს ახორციელებს აზერბაიჯანული მხარე. საქართველოს მიერ კონტროლირებად ტერიტორიაზე ვერანაირი სამუშაოები ან რაიმე სტატუს კვოს ცვლილება არის წარმოუდგენელი და შეუძლებელი. ამიტომ კიდევ ვაზუსტებ, რომ, თუ აზერბაიჯანული მხარე აწარმოებდა რაიმე სამუშაოებს თავის მიერ კონტროლირებად ტერიტორიაზე, ეს არ ნიშნავს, რომ რაიმე სახით იცვლება სტატუს კვო“, - განაცხადა ლაშა დარსალიამ და აღნიშნა, რომ ემოციურმა განცხადებებმა შესაძლოა, ხელი შეუშალოს ორ ქვეყანას შორის მიმდინარე მოლაპარაკებებს.
დავით გარეჯის სამონასტრო კომპლექსს დღეს საპატრიარქოს დელეგაცია ეწვია. სასულიერო პირებმა ჩიჩხიტურის მიმდებარე ტერიტორია მოინახულეს, სადაც აზერბაიჯანული მხარე რამდენიმე დღეა, გზის გაყვანის სამუშაოებს ახორციელებს.
საპატრიარქოს დელეგაციის შემადგენლობაში მყოფი სასულიერო პირები ამბობენ, რომ გზის გაყვანა თითქმის დასრულებულია.
