სიღნაღში, ე.წ. ბროწლიანის ტერიტორიაზე, რესტორან `ბროწლიანის~ და წნორი - სიღნაღის საავტომობილო გზის სიახლოვეს ასაფეთქებელი მოწყობილობები აღმოჩინეს.
როგორც კახეთის საინფორმაციო ცენტრისთვის გახდა ცნობილი, ასაფეთქებელი მოწყობილობები სოფელ საქობოს მაცხოვრებლებმა აღმოაჩინეს, რომლებიც ტყეში ფიჩხს აგროვებდნენ. მათი თქმით, რკინის ნაკეთობები ტომარაში იყო მოთავსებული და მიწა ჰქონდა წაყრილი. ერთ-ერთი მათგანი რეზერვისტთა ბატალიონში ნამყოფი აღმოჩნდა და მიხვდა, რომ ტომარაში ასაფეთქებელი მოწყობილობები იყო. აღნიშნულის შესახებ თვითმხილველებმა საპატრულო პოლიციას შეატყობინეს. სამართალდამცავები შემთხვევის ადგილზე მანამდე არ მივიდნენ, სანამ თვითმხილველებმა ასაფეთქებელი მოწყობილობების აღმოჩენის შესახებ თანასოფლელებს არ უთხრეს.
სიღნაღის რაიონული პროკურორის დავით კოჭლამაზაშვილის განცხადებით, ასაფეთქებელი მოწყობილობები გამნაღმველებმა ამოიღეს და უკვე გაანადგურეს. მომხდართან დაკავშირებით სისხლის სამართლის საქმე აღიძრა. გამოძიებას შს სიღნაღის რაიონული სამმართველო აწარმოებს.
