პრინციპული შეთანხმება გახლავთ ის, რომ დღემდე ქვეყნის მიერ გადადგმული ნაბიჯები, ინფექციის და ეპიდემიის შეკავებასთან დაკავშირებით, არის სწორი, - ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ, საქართველოს პრემიერ-მინისტრის მეთაურობით, დღეს მთავრობის ადმინისტრაციაში მედიკოსებთან გამართული შეხვედრის შემდეგ განაცხადა.
მისი თქმით, განსაკუთრებული ყურადღება უნდა გამახვილდეს ამ შეკავების მექანიზმების აღსრულებასა და მონიტორინგზე, თუ რამდენად სწორედ ხორციელდება აღსრულება იმისა, რასაც დღეს მთავრობა ადგენს და რა რეკომენდაციებსაც აძლევს მოსახლეობას.
"მხედველობაში მაქვს სასწავლო პროცესისა და ფრენების შეწყვეტა, მთელი რიგი დაწესებულებების მუშაობის შეჩერება, სავაჭრო დაწესებულებებისა და ა.შ. და ძალიან მნიშვნელოვანია ამ ყველაფრის აღსრულება და მონიტორინგი, რამეთუ ეპიდემიის შეკავების მთავარი მექანიზმი გახლავთ სოციალური დისტანცირება. სოციალური დისტანცირება ექსპერტების მიერ ჩაითვალა, როგორც ყველაზე უფრო მძლავრი მექანიზმი ეპიდემიის შენელებისა და გავრცელების პრევენციის თვალსაზრისით,“- თქვა გამყრელიძემ.
დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა შეხვედრის დასრულების შემდეგ გამართულ ბრიფინგზე, აგრეთვე, კორონავირუსის ინფექციის შემთხვევათა სტატისტიკაზე ისაუბრა.
„ ჩვენ დღევანდელი დილის მონაცემით გვაქვს 43 ლაბორატორიულად დადასტურებული შემთხვევა. შემთხვევათა უმეტესობა გახლავთ იმპორტირებული. მოგეხსენებათ, გუშინ გვქონდა 40 და დღეს დილით დაემატა 3 შემთხვევა, კვლევაშია კიდევ რამდენიმე ნიმუში და დღეს, ალბათ, კიდევ გაიტესტება, დაახლოებით, 100-მდე ნიმუში. სულ, ქვეყანაში 30 იანვრიდან დღემდე გამოკვლეულია 1073 შესაძლო შემთხვევა და აქედან 43-ში დადასტურდა კორონავირუსული ინფექცია.
მნიშვნელოვანია, რომ საკარანტინო ზონებში არის 1575 ადამიანი და, ასევე, იქიდან და თვითიზოლაციიდან უკვე გამოვიდა 191 ადამიანი. თვითიზოლაციაში ჯერ კიდევ იმყოფება 1781 ადამიანი,“- განაცხადა ამირან გამყრელიძემ.