ჰოლივუდის ერთ-ერთი ყველაზე გავლენიანი კინოპროდიუსერი ჰარვი ვაინშტაინი ნიუ იორკის სასამართლოში გამართულ პროცესზე ნაფიცმა მსაჯულებმა დამნაშავედ ცნეს.
ყოფილი კინოპროდიუსერი დამნაშავედ ცნეს სექსუალურ ძალადობაში თავის ასისტენტის მირიამ ჰალეის მიმართ და სტილისტის ჯესიკა მანის გაუპატიურებაში, რომელიც მსახიობობას ესწრაფვოდა.
ვაინშტაინს მოეხსნა სხვა უმძიმესი ბრალდებები, რითაც მისთვის შესაძლებელი იყო სამუდამო პატიმრობის განაჩენი გამოეტანათ.
67 წლის ვაინშტანს არცერთ ბრალდებაში თავი დამნაშავედ არ უცვნია. მის წინააღმდეგ აღძრულია ასევე საქმეები ლოს ანჯელესისა და ლონდონის პროკურატურების მიერ.
ჰარვი ვაინშტაინს 25-წლიანი პატიმრობა ემუქრება.
პროდიუსერი ჰარვი ვაინშტაინი ჰოლივუდში ერთ-ერთი ყველაზე გავლენიანი ადამიანი იყო. მისი ფილმები არაერთგზის იყო წარდგენილი "ოსკარზე", მას "შეყვარებული შექსპირისთვის" კინოაკადემიის ჯილდოც გადაეცა.
2017 წელს "ნიუ-იორკ ტაიმსში" გამოქვეყნებული შოკისმომგვრელი სტატიის შემდეგ ათობით ქალმა (ძირითადად მსახიობებმა და მოდელებმა) განაცხადა, რომ ვაინშტაინი აწუხებდა მათ, თავის ნომერში შიშველი ხვდებოდა, აიძულებდა ენახათ როგორ იღებდა აბაზანას ან მათგან მასაჟის გაკეთებას მოითხოვდა.
მსხვერპლთა სიაში ბევრი ცნობილი მსახიობი მოხვდა, მათ შორის გვინეთ პელტროუ, მირა სორვანო, ანჯელინა ჯოლი. სკანდალის შემდეგ ჰარვის ცოლი გაშორდა. საპროდიუსერო კომპანია The Weinstein Company-ის დირექტორთა საბჭოს წევრებმა ვაინშტაინთან კონტრაქტი გაწყვიტეს.
2018 წელს ვაინშტაინის საპროდიუსერო კომპანიამ Weinstein Company (TWC), გაბანკროტების შესახებ განაცხადა.
სკანდალის შემდეგ, ჰარვი ვაინშტაინი ამერიკისა და ბრიტანეთის კინოაკადემიიდან, ასევე პროდიუსერთა გილდიიდან გარიცხეს.
სექსუალურად მოძალადე გავლენიანი კინოპროდიუსერის მიმართ გამოთქმულმა ბრალდებებმა საფუძველი დაუდო გლობალურ მოძრაობას "მეც", #Metoo, რომელმაც მსოფლიოს მასშტაბით ასეულობით ქალისთვის შთამაგონებელი აღმოჩნდა, ხმამაღლა ესაუბრად გავლენიანი მამაკაცების მხრიდან სექსუალური ძალადობის შემთხვევებზე.