საზღვაო ტრანსპორტის სააგენტოში აცხადებენ, რომ ლიბერიის დროშის ქვეშ მცურავ გემზე დარჩენილი ეკიპაჟის წევრები უსაფრთხოდ არიან.
სააგენტოს ინფორმაციით, გემთმფლობელ კომპანიასთან და გატაცებული მეზღვაურების ოჯახის წევრებთან კომუნიკაცია ჰქონდათ. ამ ეტაპზე სხვა დეტალები უცნობია.
"ოჯახის წევრებთან შეხვედრა ახლა დავასრულეთ, მივაწოდეთ ჩვენს ხელთ არსებული ინფორმაცია. ვმუშაობთ როგორც ლიბერიის სახელმწიფოსთან, ასევე გემთმფლობელთან და გვაქვს აქტიური კომუნიკაცია დიპლომატიურ სამსახურებთან, ისინიც აქტიურად არიან ჩართული პროცესებში", - აცხადებს საზღვაო ტრანსპორტის სააგენტოს ხელმძღვანელი თამარ იოსელიანი.
აფრიკაში, ქალაქ ლაგოსთან მდებარე ლიბერიის დროშის ქვეშ მცურავ ტანკერს მეკობრეები თავს დაესხნენ. გატაცებული 10 მეზღვაურიდან 4 საქართველოს მოქალაქეა.
საზღვაო ტრანსპორტის სააგენტოს ინფორმაციით, შემთხვევა საქართველოს დროით, დაახლოებით დილის 5 საათზე მოხდა.