შეერთებული შტატების საგარეო ურთიერთობათა კომიტეტმა რუსეთის წინააღმდეგ სანქციათა კანონპროექტს მხარი დაუჭირა. იტყობინება საერთაშორისო სააგენტო Bloomberg-ი.
სანქციების კანონპროექტი "აშშ-ის უსაფრთხოების კრემლის აგრესიისგან დაცვის აქტი", რომელსაც ავტორები "ჯოჯოხეთის სანქციებს" უწოდებენ, რესპუბლიკელმა სენატორმა ლინდსი გრემმა და დემოკრატმა სენატორმა ბობ მენენდეზმა წარადგინეს.
კომიტეტში კანონპროექტს 17-მა სენატორმა დაუჭირა მხარი, 5 წინააღმდეგ წავიდა.
კანონპროექტის თანახმად, შეერთებული შტატების პრეზიდენტმა საჯაროდ უნდა მოუწოდოს რუსეთის ხელმძღვანელობას დაუბრუნოს ანექსირებული ყირიმი უკრაინას, შეწყვიტოს პრორუსული ძალების ძალადობის მხარდაჭერა აღმოსავლეთ უკრაინაში, ოკუპაცია და რუსეთის ხელმძღვანელობით მოქმედი ძალების მხარდაჭერა საქართველოსა და მოლდოვის ტერიტორიაზე.
ასევე, აშშ-ს პრეზიდენტმა "უნდა დაგმოს და დაუპირისპირდეს" რუსეთის სავარაუდო ჩარევას ამერიკული ინსტიტუტების საქმიანობაში.
დოკუმენტის ავტორების მოთხოვნით, სანქციები უნდა დაწესდეს რუსეთის პოლიტიკურ პირებსა და ოლიგარქებზე, რომლებიც უშუალოდ და არაპირდაპირ მონაწილეობენ რუსეთის უკანონო და კორუმპირებულ ქმედებებში.
იმისათვის, რომ კანონპროექტი ძალაში შევიდეს, მას მხარი უნდა დაუჭიროს წარმომადგენელთა პალატამ, სენატმა და შეერთებული შტატების პრეზიდენტმა.
