„მომდევნო ერთი წლის განმავლობაში ჩვენ ვნახავთ იმ პროგრამის შესრულებაზე ორიენტირებას, რომელიც საქართველოს პარლამენტში დღეს პრემიერ-მინისტრობის კანდიდატმა, გიორგი გახარიამ და მინისტრობის სხვა კანდიდატებმა წარმოადგინეს და რომლის არც ერთი პუნქტით ნაციონალური მოძრაობის არც ერთი შტო არ დაინტერესებულა", - აღნიშნული განცხადება ფრაქცია ქართული ოცნების თავმჯდომარემ მამუკა მდინარაძემ გადაცემაში „პირველები" გააკეთა.
მისი თქმით, მინისტრობის კანდიდატების ოპოზიციურ ფრაქციებთან შეხვედრისას საუბარი უნდა ყოფილიყო სამთავრობო პროგრამის განხორციელებაზე, თუმცა, რაზეც საუბარი მათ არ ისურვეს.
„პირველ რიგში საუბარი უნდა ყოფილიყო სამთავრობო პროგრამის განხორციელებაზე. მათ შესაძლოა გაეკრიტიკებინათ პროგრამა ან მისი რაღაც ნაწილი, მაგრამ მათ ამაზე საუბარი არ ისურვეს. ოპოზიციამ პრემიერ-მინისტრობის კანდიდატს დაკითხვის ფორმატი შესთავაზა. გაგვიგია და მთელ მსოფლიოში დამკვიდრებული ტერმინია კითხვისგან გაქცევა, მაგრამ პირველად გავიგეთ პასუხებისგან გაქცევა. დღესაც ნაციონალური მოძრაობა გაექცა პასუხებს. მათ პასუხების მოსმენისაც კი ეშინიათ, იმდენად არ არიან მართლები. ჩვენი პოლიტიკური განაცხადია, რომ ტყუილებზე აგებული კამპანია დასრულდეს", - განაცხადა მამუკა მდინარაძემ.
