პრემიერის განცხადებით, გასულ კვირას საქართველოს მთავრობამ 10-წლიანი ევრობონდი გამოუშვა, რომლის ტრანზაქციაც დღეს სრულდება, თუმცა მოქმედებები გასული კვირის განმავლობაში ჩატარდა.

"საქართველოს 2013 წელს საკმაოდ დიდი ვალი ჰქონდა გასასტუმრებელი. ეს იყო, ერთის მხრივ, საერთაშორისო სავალუტო ფონდის ვალი და მეორეს მხრივ, ევრობონდების. რეალურად, ეს ვალი გასტუმრებულია და საქართველოს მთავრობას ვალის პრობლემა 2021 წლამდე აღარ გააჩნია. საქართველოს მთავრობამ ევრობონდების გამოშვებით გამოისყიდა ის ვალი, რომელიც 2013 წელს უნდა გადაეხადა. ხოლო იმ თანხას, რომელიც საქართველოს მთავრობას 2021 წლისთვის ექნება გადასახდელი, თავისუფლად გაისტუმრებს ამ ვალის რესტრუქტურიზაციის ან მთლიანად გადახდის გზით", - განაცხადა ნიკა გილაურმა.

პრემიერ-მინისტრის განმარტებით, 2011 წელს ემისირებული ევრობონდების საპროცენტო განაკვეთი შედარებით დაბალია 2008 წელს გამოშვებულ ევრობონდების საპროცენტო განაკვეთთან შედარებით. გილაურის თქმით, 2008 წელს გამოშვებული 500 მილიონი დოლარის საპროცენტო განაკვეთი 7,5 %-ს შეადგენდა, ხოლო ახლადგამოშვებული ევრობონდების საპროცენტო განაკვეთი 7,1 %-ია.

"როდესაც ქვეყანა იღებს გრძელვადიან ვალს, საპროცენტო განაკვეთი იზრდება, თუმცა ჩვენს შემთხვევაში ასე არ მოხდა და საპროცენტო განაკვეთი შემცირდა, რაც მნიშვნელოვანი მიღწევაა და ბოლო წლებში არც ერთ ქვეყანას არ ჰქონია. ამას თავად საივესტიციო ბანკირებიც აღიარებენ", - განმარტა პრემიერ-მინისტრმა.

გილაურის თქმით, ევრობონდების გამოშვებით საქართველომ ინვესტორების ნდობა უფრო გაიმყარა.

"ინვესტორები ენდობიან ქვეყნის პოლიტიკურ და ეკონომიკურ განვითარებას და აქვთ ნდობა საქართველოს მთავრობის მიმართ. 2008 წელს, როცა ევრობონდი გამოვუშვით და რომლის საპროცენტო განაკვეთიც იყო 7,5 %, იყო ეკონომიკური ბუმი და მსოფლიოში არსებობდა ბევრი საინვესტიციო კაპიტალი, რომელიც განვითარებადი ქვეყნებისკენ მიემართებოდა. 2008 წელს საქართველოს ეკონომიკურმა ზრდამ 12 % შეადგინა და დღეს, როდესაც არც თუ ისე მარტივი სიტუაციაა: ქვეყანამ გამოიარა დაპირისპირება რუსეთთან, ეკონომიკური კრიზისი... ამის მიუხედავად, მსოფლიო ბანკირები და ფინანსისტები ენდნენ ქვეყანას და ჩვენს ევრობონდებს აქვს დაბალი საპროცენტო განაკვეთი. ეს ნიშნავს იმას, რომ მსოფლიო ინვესტორები საქართველოს ენდობიან იმაზე უფრო მეტად, ვიდრე სხვა ქვეყნებს ჩვენს რეგიონში", - განაცხადა ნიკა გილაურმა.

მისივე თქმით, ევრობონდების გამოშვება განხორციელდა მაშინ, როდესაც პორტუგალიას სესხებს 10-12 %-ის ფარგლებში აძლევენ, საბერძნეთს - 10-11 %-ის ფარგლებში, ხოლო ირლანდიას - 11-12 %-ის ფარგლებში. გილაურის თქმით, ევროკავშირისა და ნატოს წევრ ქვეყნებთან შედარებით, საქართველოს უფრო მეტი ნდობა აქვს მსოფლიო საფინანსო ბაზარზე.

ამასთან, პრემიერ-მინისტრი აცხადებს, რომ ახალი ევრობონდების ემისიის შემდგომ კერძო სექტორს ახალი ბაზრები ეხსნებათ და ისინი თანხმების მოძიებას შედარებით დაბალი საპროცენტო განაკვეთით შეძლებენ.

"აქამდე კერძო სექტორს გარკვეული შეზღუდვები ჰქონდა, რათა ახალ ბაზარზე შესულიყო და უფრო იაფიანი და გრძელვადიანი სესხი ჩამოეტანა. ტრანზაქციის შემდგომ კი კომერციულ ბანკებს და მსხვილ კომპანიებს თავისუფლად შეეძლებათ წავიდნენ და უფრო იაფიანი და 10-წლიანი სესხი შემოიტანონ ქვეყანაში. შესაძლოა, სამომავლოდ, საპროცენტო განაკვეთიც შემცირდეს. საქართველომ კიდევ ერთხელ დაამტკიცა, რომ არის სანდო პარტნიორი მსოფლიო ინვესტორებისთვის", - განაცხადა გილაურმა.

პრემიერ-მინისტრის თქმით, 2008 წელს გამოშვებული ევრობონდებიდან მიღებული თანხებით 2009-2010 წლებში დევნილებისთვის ინფრასტრუქტურის მშენებლობა და ბიუჯეტის დაბალანსება მოხდა. გილაურის თქმით, საქართველოს საერთაშორისო სავალუტო ფონდისთვის 400 მილიონი დოლარის ოდენობის ვალი აქვს გასასტუმრებელი, რომელსაც ქვეყანა ეტაპობრივად, 2012-2014 წლებში დაფარავს.