ფინანსთა მინისტრს რვა მოადგილის ნაცვლად შვიდი მოადგილე ეყოლება. უკვე ცნობილია, რომ ფინანსთა მინისტრის ყოფილი მოადგილე ნათია მიქელაძე მუშაობას ენერგეტიკის მინისტრის მოადგილის პოსტზე გააგრძელებს. მთავრობის გადაწყვეტილებით ფინანსთა მინისტრს მოადგილეების რაოდენობა 7 ერთეულით განესაზღვრა.
ცნობილი ხდება ასევე ფინანსთა სამინისტროს სისტემაში განხორციელებული სხვა საკადრო ცვლილების შესახებაც. კერძოდ თანამდებობა დატოვა ფინანსთა სამინისტროს ფინანსური პოლიტიკის დეპარტამენტის უფროსმა გიორგი ყაველაშვილმა, რომლის ადგილზეც უკვე მამუკა ბარათაშვილი დაინიშნა. ხოლო რაც შეეხება თავად გიორგი ყაველაშვილს ის მუშაობას სხვა სამინისტროში აგრძელებს.
სამინისტროს სისტემაში განხორციელებული საკადრო ცვლილებების ფონზე შეიცვალა ფინანსთა სამინისტროსთან არსებულ დავების განხილვის საბჭოს შემადგენლობაც. საბჭოს შემადგენლობაში აღარ შედიან ნათია მიქელაძე და გიორგი ყაველაშვილი. გიორგი ყაველაშვილის ნაცვლად საბჭოს შემადგენლობაში ფინანსთა სამინისტროს ფინანსური პოლიტიკის დეპარტამენტის უფროსი მამუკა ბარათაშვილი შედის.
საბჭოში გადაადგილებების შემდეგ ფინანსთა სამინისტროსთან არსებული დავების განხილვის საბჭოს წევრები არიან: საბჭოს თავმჯდომარე კახა ბაინდურაშვილი (ფინანსთა მინისტრი), საბჭოს თავმჯდომარის მოადგილე რუსუდან კემულარია (ფინანსთა მინისტრის მოადგილე), გოგა გუგავა (იუსტიციის სამინისტროს ეკონომიკური დეპარტამენტის უფროსი), დავით თომაძე (ფინანსთა სამინისტროს დავების განხილვის სამსახურის უფროსი), გ იორგი პერტაია (საგადასახადო ომბუდსმენი), მამუკა ბარათაშვილი (ფინანსთა სამინისტროს ფინანსური პოლიტიკის დეპარტამენტის უფროსი), დავით ჩხეიძე (ფინანსთა სამინისტროს იურიდიული დეპარტამენტის უფროსი).
მასალის გამოყენების პირობები
