შემოსავლების სამსახური ახალი კურსის ფარგლებში მომსახურების პროცედურებს ამარტივებს. ხვალ, 24 თებერვალი, 12 საათზე, სასტუმრო ქორთიარდ მარიოტში, გადამხდელთა ოპერატიული და კომფორტული მომსახურების მიზნით შემოსავლების სამსახურსა და იუსტიციის სამინისტროს საჯარო რეესტრის ეროვნული სააგენტოს შორის ურთიერთთანამშრომლობის მემორანდუმი გაფორმდება. შემოსავლების სამსახურის მომსახურებების მიღება გადამხდელებს შეეძლებათ საჯარო რეესტრის ეროვნულ სააგენტოში, საქართველოს ყველა რაიონსა და ქალაქში.
საჯარო რეესტრის ეროვნული სააგენტოების მომსახურება შეესაბამება თანამედროვე სტანდარტებს, სადაც გადამხდელებს მოემსახურებათ კვალიფიციური კადრები, რომლებიც გადამხდელს შესთავაზებენ სწრაფ, მარტივ და მოსახერხებელ მომსახურებას. საჯარო რეესტრის ეროვნული სააგენტოს დახმარებით გადამხდელებს შეუძლიათმიიღონ ასამდე სახის მომსახურება და ორასამდე დასახელების ცნობა, ასევე ისარგებლებენ „ავტომატური +"-ის სერვისით, რაც დაეხმარება გადამხდელს ავტომატურ რეჟიმში მიიღოს პასუხი შემდეგ განცხადებებზე: დამატებითი ღირებულების გადასახადის გადამხდელად ნებაყოფლობითი რეგისტრაცია; ცნობა საგადასახადო დავალების შესახებ; ცნობა საბანკო ანგარიშების შესახებ; გადასახადის გადამხდელის მოწმობის აღდგენა; ელექტრონული დეკლარირების აქტივიზაცია და სხვა...