ავტოსატრანსპორტო საშუალებების ტექნიკური მომსახურების შესყიდვის პროცედურები მარტივდება.
გამარტივებული შესყიდვის საშუალებით შესაძლებელია განხორციელდეს არაუმეტეს 5 წლის ავტოსატრანსპორტო საშუალებების ან/და იმ ავტოსატრანსპორტო საშუალებების ტექნიკური მომსახურების სახელმწიფო შესყიდვა, რომელთაც გააჩნიათ მწარმოებლის ან ოფიციალური დილერის ძალაში მყოფი გარანტია.
"სახელმწიფო შესყიდვების სააგენტოს" ხელმძღვანელის ტატო ურჯუმელაშვილის განმარტებით, დღემდე ავტოსატრანსპორტო საშუალებების ტექნიკური მომსახურების შესყიდვა 5000 ლარის ოდენობის ექვემდებარებოდა გამარტივებულ ელექტრონულ ტენდერს, ხოლო შესყდივა 200 ათას ლარამდე ელექტრონულ ტენდერს ექვემდებარება.
ურჯუმელაშვილის განმარტებით, აღნიშნული პროცედურები რიგ შემთხევაში სირთულეებს ქმნიდა, რადგანაც წლის დასაწყისში სწორად ვერ ხდება გათვლა, თუ რა ნაწილი, ან რა ტიპის მომსახურეობა იქნება საჭირო. სწორედ ამ მიზეზების გათვალისწინებით მთავრობამ მიიღო გადაწყვეტილება და ახალ ავტომობილებზე და ოფიციალური დილერის ძალაში მყოფი გარანტის მქონე ავტომობილებზე ტექნიკური მომსახურების შესყიდვის პროცედურები გამარტივდა.
მთავრობაში აცხადებენ, რომ აღნიშნული პროექტი ხელს შეუწყობს და დააჩქარებს ძველი, ტექნიკურად გაუმართავი და ეკოლოგიური თვალსაზრისით საფრთხის შემცველი ავტოსატრანსპორტო საშუალებების შედარებით ახალი და ეკოლოგიური თვალსაზრისით ნაკლები ზიანის მომტანი ავტოსატრანსპორტო საშუალებებით პერიოდულ ჩანაცვლებას.
