საზოგადოებრივი მოძრაობის "სოლიდარობა უკანონო პატიმრებს" დამფუძნებელი ეკა ბესელია პარლამენტსა და სასჯელაღსრულების სამინისტროს პატიმრებთან დაკავშირებით პატრიარქის ინიციატივის პრაქტიკული განხორციელებისკენ მოუწოდებს.
"პატრიარქის ინიციატივა უთუოდ კეთულშობილური, გონივრული და დროული ინიციატივაა, რაც მნიშვნელოვნად შეამსუბუქებს საპატიმროებში არსებულ ვითარებას. ამიტომაც მივმართავთ საქართველოს პარლამენტსა და სასჯელაღსრულების, პრობაციის და იურიდიული დახმარების სამინისტროს, რათა მოკლე დროში მოხდეს პატრიარქის ინიციატივის საქმედ ქცევა", - ნათქვამია ბესელიას მოძრაობის განცხადებაში.
შეგახსენებთ, რომ სრულიად საქართველოს კათოლიკოს-პატრიარქი, უწმინდესი და უნეტარესი, მცხეთა - თბილისის მთავარეპისკოპოსი, ცხუმ-აფხაზეთის მიტროპოლიტი ილია მეორე საშობაო ეპისტოლეში აღნიშნავს, რომ "დაუსახლებელ ტერიტორიებზე მცირე დანაშაულის მქონე პატიმრებისთვის მიმაგრების ადგილები და სოფლები უნდა მოეწყოს ( თავისი მეურნეობით ), რაც დასაქმების პრობლემასაც ნაწილობრივ გადაწყვეტს და დაცულ ზონებსაც შექმნის".
