"კრწანისის" სასწავლო ბაზაზე მომხდარი აფეთქების შედეგად დაჭრილი კაპრალი ალექსანდრე თომაშვილი ამ დრომდე თბილისის პირველი საავადმყოფოს რეანიმაციულ განყოფილებაში რჩება.
ექიმების განცხადებით, მის სიცოცხლეს საფრთხე ამ დროისთვის არ ემუქრება.
20 წლის ალექსანდრე თომაშვილს ქირურგიული ოპერაცია წუხელ, სამი საათის განმავლობაში უტარდებოდა. მას ფილტვები და სასუნთქი ორგანოები აქვს დაზიანებული. დაჭრილი ჯარისკაცი საავადმყოფოში წუხელვე მოინახულა ჯანდაცვის მინისტრის მოადგილემ.
რაც შეეხება აფეთქების შედეგად დაჭრილ სხვა სამხედროებს, 12 ჯარისკაცი ამ დრომდე გორის სამხედრო ჰოსპიტალში რჩება. მათ მსუბუქი და საშუალო სიმძიმის დაზიანებები აქვთ მიღებული.
შეგახსენებთ, რომ "კრწანისის" სასწავლო ბაზაზე აფეთქება გუშინ მოხდა. გეგმიური წვრთნების დროს ჭურვი აფეთქდა, რის შედეგადაც ადგილზე გარდაიცვალა სამი ჯარისკაცი, 13 კი დაიჭრა.
პრეზიდენტის გადაწყვეტილებით, დაღუპული სამხედროების დაკრძალვის, ხოლო დაჭრილი ჯარისკაცების მკურნალობის ხარჯებს სახელმწიფო დაფარავას.
