საქართველო ტურიზმის ინდუსტრიაში არსებული პროფესიების სტანდარტების მიღებაზე იწყებს მუშაობას. საქართველოს ტურიზმის ეროვნული სააგენტოს ინფორმაციით, სააგენტო განათლების ხარისხის განვითარების ეროვნულ ცენტრთან ერთად სამუშაო ჯგუფს აყალიბებს, რომელიც ტურიზმის ინდუსტრიაში არსებული პროფესიების სტანდარტების მიღებაზე იმუშავებს.
ხვალ, 6 იანვარს ტურიზმის საინფორმაციო ცენტრში შედგება შეხვედრა, სადაც 2 მიმართულების სტანდარტების კერძოდ, სასტუმროს საქმისმწარმოებლის და რესტორნის საქმისმწარმოებლის სტანდარტებს განხილვა გაიმართება.
თითოეული მიმართულების პრეზენტაციაზე მოწვეულნი არიან შესაბამისი კერძო სექტორის წარმომადგენლები, პროფესიული სასწავლებლების ხელმძღვანელები, განათლების სამინისტროს თანამშრომლები, ექსპერტები და სხვადასხვა ასოციაციების წარმომადგენლები.
სამუშაო ჯგუფს ტურიზმის ეროვნული სააგენტოს თავმჯდომარე მაია სიდამონიძე უხელმძღვანელებს.
აღნიშნული ინიციატივა ემსახურება ტურიზმის სექტორში ცალკეული პროფესიების ხარისხის განსაზღვრას, რის შედეგადაც ნებისმიერი პროფესიული სასწავლებელი რომელიც შესთავაზებს პროგრამას ზემოთხსენებული პროფესიის შესასწავლად, იხელმძღვანელებს მითითებული სტანდარტით.