საქართველოს ეკონომიკური საზღვრის გადაკვეთასთან დაკავშირებულ სამართალდარღვევაზე ახალი სანქცია დაწესდა. აღნიშნულთან დაკავშირებით საქართველოს საგადასახადო კოდექსში ცვლილება და დამატება დღეს პლენარულ სხდომაზე მესამე მოსმენით დაამტკიცეს.
ცვლილებები ახალი სანქციის დაწესებას ითვალისწინებს, კერძოდ კი, ერთი წლის ვადით პირისთვის საქართველოს ეკონომიკური საზღვრის გადაკვეთის უფლების შეზღუდვას.
ამავე დროს, პირს, რომელსაც შეეფარდება ასეთი სანქცია, მაინც ეძლევა შესაძლებლობა გადაკვეთოს საქართველოს სახელმწიფო საზღვარი, თუ წარმოადგენს არა ნაკლებ 5 000 ლარის ოდენობის უპირობო და გამოუხმობ საბანკო გარანტიას.
აღნიშნული კანონი ძალაში 2011 წლის 1-ლი იანვრიდან შევა.