2012 წლის 1 იანვრამდე გარკვეული კატეგორიის უძრავი ნივთების ლეგალიზაცია განსხვავებული წესით განხორციელდება.
"ქონების ლეგალიზაციის შესახებ" კანონში შესატანი ცვლილების თანახმად, იმ უძრავი ნივთების ლეგალიზაციას, რომლის საკუთრების უფლების დამადასტურებელი დოკუმენტები კანონდარღვევით იქნა შედგენილი 2007 წლის 1 იანვრამდე, (როგორიცაა მიწის რეფორმის კომისიის მიერ გაცემული მიღება ჩაბარების აქტი, მიწის სარეგისტრაციო მოწმობა, მებაღეობის, ამხანაგობის მიერ გაცემული წიგნაკი, ამონაწერი საჯარო რეესტრიდან) განახორციელებს იუსტიციის სამინისტროს მმართველობის სფეროში შემავალი საჯარო სამართლის იურიდიული პირი, საჯარო რეესტრის ეროვნული სააგენტო, ხოლო ლეგალიზაციის საფასურს შეადგენს უძრავი ქონების ნორმატიულ ფასს.
გარდა თბილისის, ქუთაისის, ბათუმის, ფოთის, მცხეთის, დაბა ბაკურიანის, დაბა გუდაურის და სოფელ ანაკლიის ადმინისტრაციულ ტერიტორიებში მოქცეული უძრავი ქონების ლეგალიზებისას - ამ ტერიტორიებზე კი 1 კვ მეტრზე 10 ლარს.
ზემოთხსენებულ ქონებაზე ლეგალიზაცია ათავისუფლებს სისხლის სამართლის პასუხისმგებლობიდან ლეგალიზაციის განმახორციელებელ პირს და ლეგალიზებული ქონების მესაკუთრეს.
კანონში შესატანი ცვლილებებით, მოხდება სამოქალაქო ბრუნვის სტაბილურობის უზრუნველყოფა და ამ ურთიერთობებში მონაწილე სუბიექტების კანონიერი ინტერესებისა და უფლებების დაცვა გარკვეული გარანტიებით.
