წამახალისებელი გათამაშების მოწყობის მსურველს ფინანსთა სამინისტროს მომსახურების სააგენტოსთვის გასაწევი მომსახურების საფასურის გადახდა წინასწარ მოუწევს.
"ლატარიების, აზარტული და სხვა მომგებიანი თამაშების მოწყობის შესახებ" კანონში შესატანი ცვლილების თანახმად, მომსახურების სააგენტოს მიერ გაწეული მომსახურებისთვის კანონით გათვალისწინებული მომსახურების საფასურის გადახდის მექანიზმი იხვეწება.
კანონპროექტის მიზანია ასევე დაზუსტდეს შემოსავლების სამსახურში წარსადგენი დოკუმენტაციის მექანიზმი.
"ლატარიების, აზარტული და სხვა მომგებიანი თამაშების მოწყობის შესახებ " კანონში შესატანი ცვლილებების თანახმად წამახალისებელი გათამაშების მოწყობის მსურველი პირი სააგენტოს მიერ მომსახურების განხორციელებამდე ვალდებულია მომსახურების საფასური გადაიხადოს, რაც 10 ათასი ლარით განისაზღვრება, დამატებითი ღირებულების გადასახადის ჩათვლით.
ფინანსთა სამინისტროს წამახალისებელ გათამაშებასთან და ლატარიასთან დაკავშირებული საკითხების განმხილველი საბჭოს მიერ უარყოფითი გადაწყვეტილების მიღების შემთხვევაში წამახალისებელი გათამაშების მოწყობის მსურველ პირს გადახდილი მომსაუხრეობის საფასური უკან დაუბრუნდება. საფასურის დაბრუნების წესს ფინანსთა მინისტრი განსაზღვრავს.
იმავდროულად ცნობილი ხდება, რომ კანონპროექტით გათვალისწინებული დებულება არ გავრცელდება წამახალისებელი გათამაშების მოწყობის მსურველ იმ პირთა მიმართ, რომელიც საჯარო სამართლის იურიდიულ პირს, საქართველოს ფინანსთა სამინისტროს მომსახურების სააგენტოს ამ კანონის ამოქმედებამდე წერილობით თამაშების ზოგადი წესს წარუდგინეს.