14 ნოემბერს, კვირას, 12.00 საათზე "რომპეტროლის სეზონი 2010"-ს ფარგლებში ვარდების მოედანზე, წყვილთა საავტომობილო რბოლა პროფესიონალთა და მოყვარულთა შორის გაიმართება.
საავტომობილო ფედერაციის ინფორმაციით, საქართველოს საავტომობილო სპორტის ისტორიაში ეს არის პირველი შემთხვევა, როდესაც რბოლაში პროფესიონალი და მოყვარული მბრბოლელები იასპარეზებენ.
„რბოლა განსაკუთრებულად იმითაა საინტერესო, რომ მაღალი კატეგორიის ლიცენზიის მქონე მოყვარულებს საშუალება მიეცემათ პროფესიონალებს შეეჯიბრონ. რბოლა ვარდების მოედანზე გაიმართება და საერთო ჯამში მონაწილეობას 24 მანქანა მიიღებს. დაწყვილებამდე ყველა მონაწილე საკვალიფიკაციო ტურს გაივლის, სადაც დროის მაჩვენებლების მიხედვით გადაწყდება ვინ ვისთან იასპარეზებს. ღონისძიება ტრადიციულად „რომპეტროლის" მხარდაჭერით იმართება, რომელიც ყველა ღონისძიებისთვის სოლიდურ საპროზო ფონდს აწესებს, თუმცა ამჯერად პრიზი „თეგეტა მოტორსსაც" აქვს მომზადებული,"-აცხადებს საავტომობილო ფედერაციის პრეზიდენტი მევლუდ მელაძე.
შეჯიბრზე, „რომპეტროლ საქართველოს" მიერ, ნახევარი ტონა საწვავია დაწესებული, რომელიც სამ საპრიზო კატეგორიაში გამარჯვებულ მრბოლელებზე გადანაწილდება.
„მოხარული ვართ, რომ საავტომობილო სპორტი პოპულარობით სარგებლობს. ჩვენ უკვე რამდენიმე წელია ამ სპორტის აქტიური მხარდამჭერები ვართ და ვცდილობთ მის პოპულარიზაციაში ჩვენი წვლილი შევიტანოთ. ამჯერად მოყვარულ მრბოლელებს მართლაც საუკეთესო შანსი ეძლევათ ძალები პროფესიონალებთან მოსინჯონ", - აცხადებს „რომპეტროლ საქართველოს" გენერალური დირექტორი ალექსანდრე ალბინი.
რალის შემდეგი ეტაპი 21 ნოემბერს კვლავ თბილისში გაიმართება. აღნიშნული ტურნირით „რომპეტროლის სეზონი 2010" დასრულდება და ტაიმაუტს გაზაფხულამდე აიღებს.
2008 წლიდან ავტოსპორტის გენერალური სპონსორი „რომპეტროლ საქართველოა". კომპანია ყველა ეტაპზე უზრუნველყოფს საწვავით მრბოლელებს, ასაჩუქრებს გამარჯვებულებს და ტრადიციად აქცია მათი წარმატებების შეჯამება გალა-დაჯილდოვების ცერემონიაზე, რომელიც ყოველი ახალი ეტაპის დაწყებამდე ტარდება.