ძიუდოს ფედერაციის პრეზიდენტი დილარ ხაბულიანმა დაკავებული თანამდებობა დატოვა. ხაბულიანმა შესაბამისი განცხადება დღეს, სპორტისა და ახალგაზრდობის საქმეთა მინისტრ ლადო ვარძელაშვილთან შეხვედრის შემდეგ გააკეთა.
ძიუდიოს ფედერაციის უკვე ყოფილი პრეზიდენტის განმარტებით, მან გადადგომის შესახებ გადაწყვეტილება 2 თვის წინ მიიღო, მიზეზად კი ფედერაციაში არსებული არაჯანსაღი მდგომარეობა დაასახელა.
"2 თვის წინ შეგნებულად გავედი შვებულებაში და ამის მიზეზი ძიუდოს ფედერაციაში არსებული არაჯანსაღი მდგომარეობა იყო. ჩემი გადადგომა ტოკიოში მომხდარ ინციდენტს არ უკავშირდება. გადაწყვეტილება თანამდებობის დატოვების შესახებ უფრო ადრე მივიღე", - განაცხადა ხაბულიანმა და დასძინა, რომ ტოკიოში მომხდარ ინციდენტზე მთელი პასუხისმგებლობის ყოფილ მთავარ მწვრთნელზე, ამირან ტოტიკაშვილზე დაკისრება არ შეიძლება.
სპორტისა და ახალგაზრდობის საქმეთა მინისტრის ლადო ვარძელაშვილის განმარტებით, ხაბულიანის გადაგომა ტოკიოს ინციდენტს არ უკავშირდება.
"ეს მისი გადაწყვეტილებაა. ეროვნული ნაკრების მწვრთნელისა და მწვრთნელთა კორპუსის გადაყენება ტოკიოში მომხდარ შემთხვევას მართლაც უკავშირდება, თუმცა დილარ ხაბულიანის გადადგომას ამ ინციდენტთან საერთო არაფერი აქვს", - აღნიშნა ვარძელაშვილმა.
შეგახსენებთ, რომ ძიუდოს ეროვნული ნაკრების მთავარმა მწვრთნელმა ამირან ტოტიკაშვილმა თანამდებობა 18 სექტემბერს დატოვა. მიზეზი ტოკიოში მომხდარი ინციდენტი გახდა - საქართველოს ჩემპიონი ირაკლი ცირეკიძე მსოფლიო ჩემპიონატს დაუდევრობის გამო გამოეთიშა.