საქართველოში გრიპის ვირუსის ათი შემთხვევა ლაბორატორიულად დადასტურდა. დაავადებათა კონტროლის ეროვნული ცენტრის გენერალური დირექტორი, ამირან გამყრელიძე მოსახლეობას მოუწოდებს, შესაბამისი პრევენციული ღონისძიებები დაიცვას.
„ლაბორატორიულად დადასტურებული დაახლოებით ათი შემთხვევა უკვე გვაქვს. მოსახლეობას ამ თვალსაზრისით მოვუწოდებთ, რომ შესაბამისი პრევენციული ღონისძიებები დაიცვას. აცრა არის ყველაზე უკეთესი პრევენციული ღონისძიება", – განაცხადა ამირან გამყრელიძემ.
მისი თქმით, აუცილებელია ზოგადი ჰიგიენური ნორმების დაცვა, ოთახის განიავება და მაღალი ტემპერატურის შემთხვევაში ოჯახის ექიმისთვის მიმართვა.
სპეციალისტების განცხადებით, გრიპის ვირუსი დეკემბრის ბოლოდან გააქტიურდება და გავრცელდება, პიკს კი 2019 წლის თებერვალში მიაღწევს.
დაავადებათა კონტროლის ცენტრის ხელმძღვანელმა აღნიშნა, რომ სახელმწიფოს დახმარებით ვირუსის საწინააღმდეგო აცრები 39 ათასმა ადამიანმა ჩაიტარა, კიდევ 10 ათასი ადამიანის აცრა კი კერძო სექტორმა დააფინანსა. წელს სახელმწიფომ გრიპის საწინააღმდეგო 40,9 ათასზე მეტი ვაქცინა შეიძინა. ქვეყანაში შემოტანილია ჯანდაცვის მსოფლიო ორგანიზაციის მიერ რეკომენდებული ჰოლანდიური ვაქცინა. ნებისმიერ მსურველს შეუძლია მისი აფთიაქებში შეძენა. პრეპარატის ღირებულება 30 ლარია. ვაქცინაცია 50-60%-ით ამცირებს ინფიცირების რისკს.
